Qaskeleńde kúieýin qasaqana óltirdi dep aiyptalǵan kópbalaly anaǵa qatysty sot protsesi aiaqtaldy. Alqabiler sottalýshyny tolyq aqtaý týraly sheshim shyǵardy. Bul týraly quqyq qorǵaýshy Dina Tansari áleýmettik jelidegi paraqshasynda jazdy, dep habarlaidy ult.kz.
Quqyq qorǵaýshynyń málimetinshe, áiel birneshe jyl boiy turmystyq zorlyq-zombylyqqa ushyraǵan. Joldasy ony júieli túrde uryp-soǵyp, tunshyqtyrǵan, tipti emizýli balasymen birge aiazda dalaǵa shyǵaryp jibergen. Sondai-aq júkti kezinde de aýyr jaraqat salǵan.
Oqiǵaǵa deiin birneshe kún buryn jaǵdai ýshyǵa túsken. Áiel kúieýiniń kózine shóp salǵanyn bilip, ajyrasýǵa bel býǵan. Osydan keiin er adam taǵy da oǵan qol kótergen.
Oqiǵa bolǵan kúni áiel kúieýinen «Maǵan budan ári de qol kótere beresiń be?» dep suraǵan. Er adam oǵan oń jaýap bergen. Osydan keiin bolǵan jaǵdai áielge qatysty QR Qylmystyq kodeksiniń 99-baby 1-bóligi («Adam óltirý») boiynsha qylmystyq is qozǵalýyna sebep bolǵan.
Sot protsesi áiel úshin aýyr ótken. Ol 15 tamyzda besinshi balasyn dúniege ákelýi tiis bolǵan. Soǵan qaramastan, sot otyrystaryna Almatydaǵy tergeý izoliatorynan Qaskeleńge konvoimen kún saiyn jetkizilip otyrǵan. Eki eldi mekenniń arasy shamamen 60 shaqyrym.
Is materialdarynyń barlyǵyn zerttegen alqabiler sottalýshyny kinásiz dep tanyp, tolyq aqtaý úkimin shyǵardy.
