Qaraǵandyda 94 jastaǵy keiýananyń úiine áleýmettik qyzmetker retinde kirip, 1 million teńgesin jymqyrdy degen kúdikpen eki áiel ustaldy, dep habarlaidy ult.kz.
Polisia.kz málimetinshe, oqiǵa maýsym aiynyń sońynda bolǵan. Politsiiaǵa júgingen qart áieldiń aitýynsha, páterine ózderin áleýmettik qyzmetker retinde tanystyrǵan eki beitanys áiel kelgen. Olar eski úlgidegi aqshalardy jańasyna aýystyrý qajet ekenin aityp, úide saqtalǵan qarajattyń qaida turǵanyn suraǵan.
Esh kúmándanbaǵan keiýana aqshasynyń saqtalǵan ornyn kórsetken. Kóp uzamai beitanys áielder úiden shyǵyp ketkennen keiin zeinetker ózine tiesili 1 million teńgeniń joǵalǵanyn baiqap, birden politsiiaǵa habar bergen.
Politseiler jedel-izdestirý is-sharalary barysynda beinebaqylaý kameralaryndaǵy jazbalardy zerdelep, kúdiktilerdiń júrgen baǵytyn anyqtady. Nátijesinde olardyń jeke basy belgili bolyp, eki áiel qolǵa tústi. Belgili bolǵandai, kúdiktiler Almaty qalasynyń turǵyndary.
Atalǵan derek boiynsha qylmystyq is qozǵalyp, sotqa deiingi tergeý jalǵasyp jatyr. Sonymen qatar politseiler olardyń Qaraǵandy oblysynda jáne elimizdiń basqa óńirlerinde jasalǵan osyǵan uqsas qylmystarǵa qatysy bar-joǵyn tekserýde.
Osyǵan bailanysty politsiia azamattardy, ásirese egde jastaǵy týystaryn alaiaqtardyń jii qoldanatyn tásilderi týraly aldyn ala eskertýge shaqyrdy. Tártip saqshylary ózin áleýmettik qyzmetker, kommýnaldyq mekeme nemese memlekettik organ ókili retinde tanystyrǵan beitanys adamdardy úige kirgizbeýge, aqsha men baǵaly zattardyń saqtalǵan ornyn kórsetpeýge jáne kúmándi jaǵdai týyndasa, birden 102 nómirine habarlasýǵa keńes beredi.
