Búgin sot protsesi barysynda prokýror Orda.kz-tiń burynǵy bas redaktory Gúlnar Bajkenovanyń birden úsh epizod boiynsha kinási tolyq dáleldengenin málimdedi. Bul zańsyz kásipkerlik qyzmet, senip tapsyrylǵan aqshalai qarajatty asa iri mólsherde jymqyrý jáne kórineý jalǵan aqparat taratý.
Memlekettik aiyptaýshynyń aitýynsha, sot protsesi barysynda qylmystyq is boiynsha keltirilgen dáleldemeler birtutas ári bir-birine tolyq úilesetin kórinis qalyptastyrǵan. Oǵan jábirlenýshiler men kýágerlerdiń aiǵaqtary, olardy rastaityn bank jáne býhgalterlik qujattar, salyq derekteri, sondai-aq mamandardyń qorytyndylary men sot saraptamalary negiz bolǵan. Prokýror qorǵaý tarapynyń bul materialdardy joqqa shyǵara alatyn obektivti dálelder usynbaǵanyn erekshe atap ótti.
Atap aitqanda, birinshi epizod zańsyz kásipkerlik qyzmetke qatysty bolǵan edi. Prokýrordyń málimdeýinshe, G.Bajkenova kásipkerlik sýbektisi retinde tirkelmegenine qaramastan, paida tabý maqsatynda Almaty qalasyndaǵy páterlerdi júieli túrde satyp alyp, qaita satqan. Bul rette tólenbegen jeke tabys salyǵynyń somasy 12,12 mln teńgeni quraidy.
Taǵylǵan eń aýyr aiyp «Orda Media KZ» JShS qarajatyn jymqyrýǵa bailanysty boldy. Aiyptaýshy taraptyń nusqasyna sáikes, G.Bajkenova ózine berilgen basshylyq ókilettikterin asyra paidalana otyryp, kompaniia aqshasyn jeke kásipkerdiń shotyna aýdarýdy uiymdastyrǵan. Tergeý barysynda bul jeke kásipkerdiń redaktsiia qyzmetkeri bolyp shyqqany anyqtaldy. Mundai operatsiialardyń jalpy somasy 84,2 mln teńgeni quraǵan. Kýáger sotta bul operatsiialardyń sottalýshynyń ótinishi boiynsha júrgizilgenin rastady.
Buǵan qatysty qorǵaý tarapy aqsha qyzmetkerlerge jalaqy tóleýge arnalǵanyn jáne «qos býhgalteriianyń» bolǵanyn ǵana aitty. Alaida prokýror atap ótkendei, sotqa bul nusqany rastaityn tólem tizimdemeleri de, kassalyq orderler de, qyzmetkerlerdiń qolhattary da, ózge qujattar da usynylmaǵan.
Aiyptaý tarapy kompaniia shotynan Haileybury Almaty jekemenshik mektebine tikelei aýdarylǵan 4,64 mln teńgege de jeke toqtaldy. Bul sottalýshynyń uly bilim alǵan mekteptiń oqý aqysy bolyp shyqqan. G. Bajkenovanyń ózi bul faktini joqqa shyǵarmai, kompaniiadan aqshany qaryzǵa alǵanyn málimdedi. Alaida is materialdarynda zańdy tulǵanyń qarajatyn jeke maqsatqa paidalanýǵa ruqsat beretin qaryz týraly shart ta, seriktestik qatysýshylarynyń tiisti sheshimi de joq, al kompaniianyń aqshasy qaitarylmaǵan.
Taǵylǵan aiyptyń úshinshi blogy G.Bajkenovanyń kásibi qyzmetine tikelei qatysty boldy. Prokýror oǵan tiesili Orda.kz internet-resýrsy arqyly shyndyqqa sáikes kelmeitin jáne azamattar men uiymdardyń ar-namysyna, qadir-qasietine jáne iskerlik bedeline nuqsan keltiretin málimetter taratylǵanyn málimdedi. Jábirlenýshilerdiń barlyǵy redaktsiia jariialanǵan málimetterdi joqqa shyǵardy, al qorǵaý tarapy jariialanǵan materialdardyń shynaiylyǵyn rastaityn obektivti dálelder usynbaǵan.
Sonymen qatar, sot tergeýi barysynda redaktsiianyń atalǵan materialdardy jariialaǵanǵa deiin jábirlenýshilerdiń pikirin de, aqparatty rastaýyn da surap habarlaspaǵany anyqtaldy.
Jábirlenýshiniń qatarynda bolǵan Almaty qalasy prokýrorynyń burynǵy orynbasary N. Aýǵanbaevqa qatysty epizod eń jarqyn mysaldardyń biri. 2024 jyly Orda.kz onyń ustalǵany týraly aqparat jariialaǵan. Bul málimet Bas Prokýratýra tarapynan teriske shyǵarylsa da G. Bajkenova materialdy sait pen áleýmettik jelidegi paraqshalarynda ornalastyrǵan.
Aiyptaý tarapynyń baǵalaýynsha, sottalýshy kásibi adaldyǵyna qoiylatyn eń tómengi talaptardy da oryndamaǵan. Ol málimetterdi teksermegen, jalǵan aiyptaýlar taǵylǵan tulǵalardyń ustanymyn suratpaǵan jáne jekelegen jaǵdailarda quzyretti memlekettik organdar rastamaǵan aqparatty jariialaǵan.
Nátijesinde prokýror sottan Gúlnar Bajkenovany taǵylǵan barlyq baptar boiynsha kináli dep tanýdy surady. Atap aitqanda, kórineý jalǵan aqparat taratqany úshin – 1 jyl 6 aiǵa (QK 274-baby 2-bóliginiń 1 men 3-tarmaqtary), senip tapsyrylǵan múlikti asa iri mólsherde jymqyrǵany úshin – 8 jylǵa (QK 189-baby 4-bóliginiń 2-tarmaǵy), zańsyz kásipkerlik qyzmeti úshin – 2 jyl 6 aiǵa (QK 214-baby 2-bóliginiń 2-tarmaǵy) bas bostandyǵynan aiyrýdy surady. Taǵylǵan aiyptaýlardyń jiyntyǵy boiynsha prokýror túpkilikti 8 jylǵa bas bostandyǵynan aiyrý jazasyn taǵaiyndaýdy, sondai-aq aiyptaýda kózdelgen jýrnalistik, jariia jáne basshylyq qyzmet túrlerimen ainalysýǵa 5 jyl merzimge tyiym salýdy surady. Sonymen birge prokýror bas bostandyǵynan aiyrý túrindegi jazany óteýdi 2 jylǵa keiinge qaldyrýdy da surady.
