Qaraǵandyda politsiia asa iri kólemdegi alaiaqtyq jasady degen kúdikpen 37 jastaǵy jergilikti turǵyndy ustady, dep habarlaidy ult.kz.
Tergeý málimetinshe, kúdikti ózin senimdi seriktes retinde kórsetip, tanysynyń senimine kirgen. Keiin qurylys materialdaryn satyp alý qajet ekenin aityp, odan birneshe ret qaryzǵa aqsha alǵan.
Polisia.kz portalynyń jazýynsha, 39 jastaǵy jábirlenýshiniń aitýynsha, kúdikti buǵan deiin ózine jáne ainalasyndaǵy adamdarǵa kómektesip júrgendikten, oǵan kúmán keltirmegen. Alǵashynda alǵan qarajatynyń bir bóligin ýaqytynda qaitaryp otyrǵanymen, keiin qaita-qaita aqsha suraǵan.
Sóitip, biylǵy aqpan aiyna qarai qaryz kólemi 7 million teńgege jetken. Keiin kúdikti barlyq qarajatty ai sońyna deiin qaitarýǵa ýáde berip, qolhat jazǵan. Alaida ýáde oryndalmai, ol bailanysqa shyqpai ketken.
Jábirlenýshi úsh ai boiy aqshasyn qaitarýǵa áreket jasaǵanymen nátije bolmaǵan soń politsiiaǵa júgingen.
Jedel-izdestirý sharalary barysynda tártip saqshylary kúdiktiniń júrgen jerin anyqtap, ony ustady. Politsiianyń málimetinshe, ol óz kinásin moiyndap, túsinikteme bergen.
Qazirgi ýaqytta atalǵan fakti boiynsha sotqa deiingi tergeý amaldary júrgizilip jatyr. Oqiǵanyń barlyq mán-jaiy anyqtalýda.
