Qazaqstanda zańsyz ainalymdaǵy qarý-jaraqty jáne onyń jasyrylǵan oryndaryn anyqtaý jumystary jalǵasyp jatyr. Bul baǵytta Ishki ister ministrligi men Ulttyq qaýipsizdik organdary birlesip jumys isteýde, dep habarlaidy ult.kz.
Máselen, Shymkenttiń Turan aýdanynda avtojol mańyndaǵy aryqtan qarý-jaraq jasyrylǵan oryn tabyldy. Ol jerden úsh ańshylyq myltyq, bir myltyqtyń kesindisi jáne tapansha tárkilengen.
Tekserý barysynda qarýlardyń biriniń 2022 jylǵy Qańtar oqiǵasy kezinde Almatydaǵy qarý-jaraq dúkeninen urlanǵany anyqtaldy.
Osyndai jaǵdai Petropavlda da tirkeldi. Qala aýmaǵyndaǵy ashyq jerden ańshylyq myltyq, nómirleri óshirilgen eki myltyqtyń kesindisi, bronejilet jáne 27 dana oq-dári tabylǵan.
Ishki ister ministrligi zańsyz saqtalǵan qarýdy óz erkimen tapsyrǵan azamattar qylmystyq jáne ákimshilik jaýapkershilikten bosatylatynyn eske saldy.
Sonymen qatar vedomstvo 20 sáýirden bastap jyl sońyna deiin halyqtan zańsyz saqtalǵan atys qarýyn, oq-dáriler men jarylǵysh zattardy satyp alý boiynsha aktsiia ótkizip jatyr.
Búginde aktsiia aiasynda azamattar shamamen 900 dana túrli qarý men 6 myńǵa jýyq oq-dárini óz erkimen tapsyrǵan.
