QR Premer-Ministriniń orynbasary Qanat Bozymbaev bastaǵan Úkimettik komissiia Mańǵystaý oblysyndaǵy tótenshe jaǵdai bolǵan jerde jumysyn jalǵastyrýda, dep habarlaidy ult.kz.
Oqiǵa ornynda jumyldyrylǵan memlekettik organdardyń is-qimyly jáne izdestirý-qutqarý jumystary úilestirilýde. Qazirgi tańda negizgi mindet – ornalasqan jeri anyqtalmaǵan eki áskeri qyzmetshini izdestirý.
Naqtylanǵan málimetke sáikes, oqý-jattyǵý-jaýyngerlik tapsyrmany oryndaý kezinde aýa raiynyń kúrt nasharlap, jeldiń kúsheiýine bailanysty 17 adam sýǵa ketken. Onyń 12-si qaza taýyp, úsh áskeri qyzmetshi qutqaryldy. Qalǵan eki áskeri qyzmetshini izdestirý jumystary jalǵasýda.
Qanat Bozymbaev áli tabylmaǵan áskeri qyzmetshilerdi qajetti barlyq kúshter men quraldardy tarta otyryp, táýlik boiy úzdiksiz izdestirýdi qamtamasyz etýdi tapsyrdy. Sondai-aq qaza tapqan áskeri qyzmetshilerdiń otbasylaryna qajetti materialdyq jáne ózge de kómek kórsetý tapsyryldy.
Ýákiletti organdar oqiǵanyń barlyq mán-jaiyn anyqtaý boiynsha jumys júrgizýde.
Komissiianyń jumysy men oqiǵa ornyndaǵy izdestirý-qutqarý is-sharalary jalǵasýda.
