Qazaqstandyq, álemniń 31-raketkasy Iýliia Pýtintseva Charlston (AQSh) WTA 500 týrniriniń jartylai finalyna shyǵa almady, dep habarlaidy "Ult aqparat".
Osy dodanyń 11-raketkasy bolyp tirkelgen Iu.Pýtintseva shirek finalda dúniejúzilik reitingte 91-orynda turǵan chernogoriialyq Danka Kovinichpen kúsh synasty.
Reitingisi tómen bolǵanymen, chernogoriialyq tennisshi ońai shaǵylatyn jańǵaq emes, tájiribesi de barshylyq. Ol úshinshi ainalymda álemniń 11-raketkasy, chehiialyq Petra Kvitovany 6:4, 6:1 esebimen jeńip ketken bolatyn.
Qarsylastar osyǵan deiin ózara eki márte kezdesse, sonyń ekeýinde de qazaqstandyq tennisshi jeńiske jetken eken.
Birinshi partiiada aldymen chernogoriialyq sportshy breikpen alǵa shyqqanymen, Iu.Pýtintseva tarazy basyn teńestirdi. Sodan soń D.Kovinich taǵy alǵa ketti – 4:2. Degenmen Iýliia breik jasap, esepti qaita teńestirdi – 4:4. Tai-breikte Pýtintseva jaqsy oinady – 7:6 (7:2).
Ekinshi sette esep 3:3 bolǵan mezette qarsylasynyń qateligin paidalanǵan D.Kovinich breik jasai aldy. Iu.Pýtintseva tarazy basyn teńestirgenimen, Kovinich taǵy bir breikke qol jetkizdi. Sosyn setke dop bergende, múmkindigin múlt jibergen joq – 7:5.
Úshinshi, sheshýshi sette chernogoriialyq tennisshi 4:0 esebimen alǵa ketti. Aqyry matchty taǵy bir breikpen túiindedi – 6:1.
Tartysty báseke 2 saǵat 52 minýtqa sozyldy.
D.Kovinich júlde qory 565 myń AQSh dollarynan asatyn jarystyń finalyna shyǵý úshin álemniń 28-raketkasy, Týnis ókili Ons Jaber nemese reitingte 36-satydaǵy amerikalyq Kori Gaýftyń bireýimen talasady.
