24 aqpanda Máskeýge eki kúndik saparmen barǵan Qyrǵyzstan prezidenti Sadyr Japarov Resei basshysy Vladimir Pýtinmen kezdesti. Bul - Japarovtyń memleket basshysy retindegi alǵashqy sapary.
Kremldiń habarlaýynsha, Resei basshysy Japarovty Qyrǵyzstan prezidenti qyzmetine kirisýimen quttyqtap, oǵan "eldegi ishki saiasi jaǵdaidy qalypqa keltire alady" dep úmittenetinin jetkizgen.
Japarov Qyrǵyzstan "Reseimen árdaiym yntymaqtastyq ornatýǵa daiyn" dep málimdep, Pýtindi elge kez kelgen ýaqytta resmi saparmen kelýge shaqyrǵan.
Azattyqtyń Qyrǵyz qyzmetiniń habarlaýynsha, kezdesý barysynda Vladimir Pýtin Qyrǵyzstandaǵy orys tiliniń mártebesi máselesin qozǵaǵan.
"Men óz tarabymnan taǵy bir sátti atap aitqym keledi. Siz orys tiliniń memlekettik mártebesin saqtap qaldyńyz. Bul ekijaqty qatynasta óte mańyzdy dep esepteimin. Bul biz úshin de, Qyrǵyzstan azamattary úshin de mańyzdy, sebebi bul Reseidiń eńbek naryǵynda belgili bir artyqshylyqtarǵa ie bolýǵa múmkindik beredi. Óz tarabymyzdan qyrǵyzstandyqtardyń óz elinde orys tilin úirene alý úshin bárin jasaimyz. Bizde belgilengen josparlar bar jáne sol boiynsha da jumys isteimiz" dedi Pýtin.
19 aqpanda úkimetke qaraityn "Slovo Kyrgyzstana" basylymynda Sadyr Japarovtyń Qyrǵyzstan men Resei qatynasy jaily "Soiýznicheskie ýzy" atty maqalasy jaryq kórgen. Onda orys tiliniń mártebesi máselesin qozǵaǵan maqala avtory "prezident jáne adam quqyǵy men erkindigine kepil retinde jáne azamat retinde bul másele boiynsha kez kelgen saiasi manipýliatsiiaǵa qarsymyn" dep atap kórsetken.
Buǵan deiin Japarov sapary barysynda koronavirýsqa qarsy vaktsina, 100 mln dollar kóleminde grant jáne jeńildikpen nesie alý máselesi, gaz baǵasy men eki el arasynda temirjol jáne aviareister sanyn ulǵaitý týraly kelissózder júretini habarlanǵan.
