Resei prezidenti Vladimir Pýtin zeinetaqy reformasy týraly zań jobasyna qol qoidy. Bul týraly Kremldiń resmi saity habarlady.
Zań boiynsha, erlerdiń zeinetke shyǵý jasy kezeń-kezeńimen 65-ke deiin, al áielderdiń zeinet jasy 60-qa deiin uzarady. Merziminen buryn zeinetke shyǵý úshin erlerdiń 42 jyl, áielderdiń 37 jyl eńbek ótili bolýy tiis.
Zańdy qazannyń 3-inde Resei Federatsiia keńesi, qyrkúiektiń 26-synda Memlekettik dýma maquldaǵan.
Shildede Resei parlamenti eldegi azamattardyń zeinetke shyǵý jasyn ulǵaitýdy, iaǵni áielder úshin - 63 jas, al erlerge - 65 jas dep belgileýdi kózdeitin úkimet ázirlegen zań jobasyn birinshi oqylymda maquldaǵan edi. Úkimet reformasyna qarsylyq tanytqan turǵyndar Reseidiń ondaǵan qalasynda narazylyq aktsiialaryna shyqqan. Qoǵamdyq saýalnama nátijeleri Resei prezidenti Vladimir Pýtinniń reitingi kúrt tómendegenin kórsetken. Pýtin 29 tamyzda ótken tikelei efir kezinde áielderdiń zeinetke shyǵý jasyn úkimet josparlaǵan segiz jyldyń ornyna bes jylǵa uzartýdy jáne úsh nemese odan da kóp balaly analardy zeinetke erterek shyǵarýdy usynǵan.
Qazan aiynyń basynda Pýtin zeinetaqy reformasyna ózi engizgen túzetý biýdjet qarjysyn únemdemeitinin, kerisinshe, qosymsha shyǵynǵa batyratynyn málimdegen. Úkimet áýelde zeinetkerlik jasyn ulǵaitýdan únemdelgen qarjyny qazirgi zeinetaqy kólemin kóbeitýge jumsamaq bolǵan.
