Resei prezidenti Vladimir Pýtin memlekettik dýmaǵa UQShU-nyń bitimgershilik qyzmeti týraly kelisimine "úilestirýshi memleket" degen uǵym engizýdi qarastyratyn zań jobasyn engizdi. Bul jóninde parlament biýlletenine súiengen "Mediazona" saity jazdy, dep habarlaidy Azattyq.
Aqparatqa qaraǵanda, "úilestirýshi memlekettiń" kómegimen "BUU-nyń beibitshilikti qamtamasyz etý operatsiialaryna arnalǵan" UQShU-nyń ujymdyq bitimgershilik kúshteri qurylady.
Operatsiialarǵa qatysý sharty kelisimde kórsetilmek. Mundai kelisim "úilestirýshi memleket" pen BUU-nyń ókiletti organy arasynda jasalýy múmkin.
Quramyna Resei, Armeniia, Belarýs, Qazaqstan, Qyrǵyzstan jáne Tájikstan kiretin UQShU elderi uiym jarǵysyna túzetý engizý týraly hattamaǵa 2021 jyly 16 qyrkúiekte Dýshanbede qol qoiǵan dep aitylady. 2021 jyly 14 jeltoqsanda Qazaqstan Qorǵanys ministrligi jobany "Ashyq normativtik-quqyqtyq aktileri" saityna shyǵarǵan. Onda UQShU-ǵa múshe elderdiń biri "úilestirýshi memleket" bola alatyny jazylǵan. Ony ujymdyq qaýipsizdik keńesi anyqtaidy. Jobany talqylaý 17 qańtarda aiaqtalǵan, alaida onyń parlamentke qashan túsetini belgisiz.
Qańtar oqiǵasy kezinde Qazaqstan prezidenti Qasym-Jomart Toqaev elge "terroristik shabýyl" jasalǵanyn aityp, UQShU-dan áskeri kómek suraǵan. Artynsha elge Resei, Armeniia, Tájikstan, Qyrǵyzstan jáne Belarýsten uzyn sany 2500 ásker keldi. UQShU áskeriniń elge kirýine alańdaǵan belsendiler olardy shyǵarýdy talap etken. 19 qańtarda bilik UQShU áskeriniń "elden tolyq shyǵarylǵanyn" habarlaǵan.
Reseidiń Ýkrainaǵa basqynshylyǵy tusynda Qazaqstanda bilikti Reseidiń yqpaly kóp uiymdardan, atap aitqanda UQShU men Eýraziia ekonomikalyq odaǵynan shyǵýǵa shaqyrǵan petitsiialar paida boldy.
