Resei basshysy Vladimir Pýtin amerikalyq rejisser Oliver Stoýnǵa bergen suhbatynda keńestiń qandyqol lideri Iosif Stalinniń qyzmetine birjaqty qarai almaitynyn aitty, - dep habarlaidy RIA Novosti.
Pýtinniń aitýynsha, ol Stalindi shekten tys demonizatsiialaýǵa qarsy ekenin, biraq stalinizm sumdyqtaryn umytýdy da qoldamaitynyn aitty. "Bul óte kúrdeli figýra", - dedi Pýtin.
Stoýn Pýtinnen Stalinniń "Reseidi fashizmnen qutqarǵanyna" qatysty qandai kózqarasta ekenin suraǵan. "Menińshe, siz óte qý adamsyz", - dep jaýap berdi Pýtin.
"Stalin óz dáýiriniń ónimi boldy. Ony jamandai berýge de bolady, natsizmdi jeńdi dep, maqtai berýge de bolady. Ony demonizatsiialaýǵa kelsek, aǵylshyn tarihynda Kromvel degen qairatker boldy. Ol qandyqol adam edi. Revoliýtsiialyq qaita qurylý tolqynynda kelip, diktatorǵa, tiranǵa ainaldy. Ulybritaniiada onyń eskertkishteri áli de tur. Napoleondy tipti qudaidai kóredi. Ol ne istep edi? Revoliýtsiia kezinde bilikke kelip, monarhiiany qaita ornatty, ózin imperator dep jariialap, Frantsiiany ulttyq katastrofaǵa, jeńiliske ákep soqtyrdy", - dedi ol.
Aitýynsha, Stalindi demozatsiialaý - Keńes Odaǵy men Reseige degen shabýyldardyń bir joly. "Búgingi Reseide stalinizmniń sarqynshaǵy bar dep kórsetý. Barlyǵymyzda da sarqynshaq bar. Endi qaitemiz? Resei túbegeili ózgerdi. Árine, sanada qalyp qoiǵandary da bar shyǵar. Biraq bul stalinizmniń sumdyǵyn umytý degendi bildirmeidi. Stalinizm kezinde milliondaǵan otandasymyz qyryldy", - dep málimdedi Resei prezidenti.
Onyń aitýynsha, Ulybritaniia premeri Ýinston Cherchill sekildi "keńeske qarsy" adamnyń ózi Stalinge jyly qabaq tanytqan. "Ótken zamannyń belgili qairatkeri Ýinston Cherchill keńeske qarsy adam bolǵan, biraq Ekinshi Dúniejúzilik soǵys bastalǵanda ol Keńes Odaǵymen seriktestik ornatýdy jaqtap, Stalindi uly qolbasshy ári revoliýtsioner dep ataǵan. Ekinshi Dúniejúzilik soǵystan keiin dál osy Cherchill qyrǵi-qabaq soǵysty bastaǵan. Keńes Odaǵy alǵashqy atom bombasyn synaqtan ótkizgende Ýinston Cherchill eki júieniń bolýyn qoldady. Ol óte oralymdy adam bolǵan. Biraq menińshe, onyń Stalinge degen kózqarasy ózgergen emes", - dedi Pýtin.
Osydan keiin Stoýn Pýtinge bylai dep suraq qoidy: "Ata-anańyz Stalinge tamsandy ma?".
"Árine. Keńes Odaǵynyń azamattarynyń basym bóligi Stalinge tamsanǵan dep oilaimyn", - dep jaýap berdi Pýtin.
