Koronavirýsqa qarsy "Spýtnik V" vaktsinasy Qytai men Úndistanda óndirilýi múmkin, Resei ony óndirý jáne qoldaný kezinde BRICS boiynsha seriktesterimen birlesip áreket etýge daiyn, dep málimdedi Resei prezidenti Vladimir Pýtin.
"Reseidiń tikelei investitsiialar qory úndistandyq jáne braziliialyq seriktestermen "Spýtnik V" vaktsinasynyń klinikalyq synaqtaryn ótkizý týraly, al Qytai men Úndistandaǵy farmatsevtikalyq kompaniialarmen osy elderde bizdiń vaktsinany óndirý ortalyqtaryn ashý týraly kelisimder jasasty, olar ózderine ǵana emes, úshinshi elder úshin de óndiredi", - dedi Pýtin videobailanys arqyly ótken BRICS-tiń XII sammitinde sóilegen sózinde.
Ol muny óte mańyzdy dep sanaitynyn atap ótti.
"Reseilik vaktsinalar tiimdi ári qaýipsiz, másele ony jappai óndirýde bolyp tur. Osy ónimderdi azamattyq ainalymǵa shyǵarý úshin jappai óndirý boiynsha kúsh biriktirý óte mańyzdy", - dep RIA Novosti Pýtinniń sózinen úzindi keltirdi.
Prezident Reseide jasalǵan koronavirýsqa qarsy úshinshi vaktsinanyń daiyn bolyp qalǵanyna nazar aýdardy.
"Biz olardy óndirý jáne qoldaný kezinde BRICS boiynsha seriktesterimizben yntymaqtastyq ornatýǵa daiynbyz", - dedi Pýtin.
Resei basshysynyń pikirinshe, COVID-19 indetimen birinshi bolyp betpe-bet kelgen Qytai búkil álemge virýspen tabysty kúresýge bolatyndyǵyn kórsetti jáne QHR-dyń bul baǵyttaǵy jumysy basqa elder úshin úlgi boldy.
Qazaqstandaǵy Resei vaktsinasy
Qazaqstan prezidenti Qasym-Jomart Toqaev keshe Resei basshysy Vladimir Pýtinmen reseilik vaktsinany óndiretin zaýyt salý týraly kelisim jasaǵanyn habarlady. Úkimet osy jobaǵa investitsiia tartý boiynsha kelissózderdi bastap ketken.
Budan buryn habarlanǵandai, Toqaev pen Pýtin Qazaqstanda vaktsinalardyń birlesken óndirisin uiymdastyrý josparyn telefon arqyly talqylady.
