Resei Prezidenti Vladimir Pýtin Siriiadaǵy ahýaldy retteý úshin kelissózder alańyn usynǵan Qazaqstanǵa jáne Memleket basshysy Nursultan Nazarbaevqa alǵysyn bildirdi. Ol Qazaqstannyń bul aimaqtyń qandai da bir ishki shielenisterine eshqashan aralaspastan bedeldi bitimger bolǵanyn aitty, dep habarlaidy "Ult aqparat" «Qazaqparatqa» silteme jasap.
Sochide ótken «Valdai» halyqaralyq diskýssiialyq klýbynyń otyrysy barysynda Qazaqstannyń Halyqaralyq qatynastar jónindegi keńesiniń tóraǵasy Erlan Qarin RF basshysy Vladimir Pýtinnen Siriiadaǵy ahýaldy retteý boiynsha Astana protsesiniń aralyq nátijeleri jóninde surady.
«Sizben ótken jylǵy kezdesýimiz Siriiadaǵy ahýal, Aleppo ainalasyndaǵy jaǵdaiǵa qatysty ótti. Biylǵy jyldyń basynda Siriiadaǵy ahýaldy retteý boiynsha Astana protsesi iske qosyldy. Alǵash ret Qazaqstan elordasy - Astanada qarsy kúresýshi ártúrli taraptardyń, sondai-aq atalmysh protsestiń kepilger elderi - Resei, Túrkiia jáne Irannyń ókilderi kelissózder ústeline otyrdy. Kelissózderdiń birneshe raýndy ótti, qujattar qabyldandy. Astana protsesiniń aralyq nátijelerine qandai baǵa berer edińiz? Jáne taǵy bir másele, qazir Taiaý Shyǵystaǵy daǵdarys jańa reńk alyp otyrǵanyn kórip otyrmyz. Men ózińiz atap ótken Soltústik Iraktaǵy kúrdterdiń referendýmy, Kerkýktegi áskeri operatsiia jáne jalpy Siriiadaǵy áskeri ahýaldyń ózgerýi týrasynda aityp otyrmyn. Siriia daǵdarysyn retteý keleshegi qandai jáne Taiaý Shyǵystaǵy jalpy ahýaldy qalai baǵalaisyz?», - dedi Erlan Qarin.
«Siriialyq retteý jáne Astana protsesine qatysty aitar bolsam, eń aldymen, Qazaqstanǵa jáne Prezident Nazarbaevqa bizge jáne osy protsestiń ózge qatysýshylaryna Astana alańyn usynǵany úshin alǵysymdy bildiremin. Qazaqstan jai ǵana bas qosatyn jer emes. Ol - óte qolaily alań. Men munda Qazaqstannyń beitarap pozitsiiasyn, Qazaqstannyń bul aimaqtyń qandai da bir ishki shielenisterine eshqashan aralaspaǵanyn, kerisinshe, bedeldi bitimger bolyp tabylatynyn aityp otyrmyn. Aita keteiin, Prezident Nazarbaev barlyq shielenisýshi jáne bitimge kelýshi taraptardy kelissózder ústeliniń basynda ustap qalý úshin belgili bir jaýapkershilikti óz moinyna alǵan kezder de bolǵan. Sol úshin alǵysymyz sheksiz. Astana protsesiniń betalysy oń, árine, problemalar da joq emes. Biraq jalpy - pozitivti», - dep jaýap qaiyrdy Vladimir Pýtin.
Sondai-aq Resei basshysy Siriia boiynsha eń mańyzdy máselege - qantógisti toqtatýǵa qol jetkizý múmkin bolǵanyn atap ótti.
«Túrkiia, Iran jáne Siriia úkimetiniń ustanymynyń arqasynda ózekti máseleler boiynsha pozitsiialardy jaqyndastyrýǵa múmkin boldy, bul - qantógisti toqtatý. Sondai-aq deeskalatsiia aimaqtaryn qurý, bul - Siriia boiynsha sońǵy eki jyldaǵy jumystardyń, sonyń ishinde Astana protsesiniń basty jetistigi. Aita keteiin, Astanadaǵy kelissózderge qatyspaityn, biraq qashyqtan qatysyp otyrǵan jáne bolyp jatqan protsesterge yqpal etetin ózge elder de, sonyń ishinde AQSh aitarlyqtai úlesterin qosýda. Biz amerikalyq áriptestermen bul másele boiynsha ózara qarym-qatynastamyz. Olar turaqty, biraq ońai emes, pikirtalastar da bolyp turady. Degenmen, bul yqpaldastyqtyń negativten buryn, pozitivti tustary kóp. Osy ýaqytqa deiin biz kóp másele boiynsha bir mámilege qol jetkizip keldik, sonyń ishinde Izrail men Iordaniia memleketteriniń múddeleri bar deeskalatsiianyń ońtústik aimaǵy boiynsha. Árine, bul protseske Saýd Arabiiasy, Mysyr, Iordaniia, Katar jáne shaǵyn, biraq mańyzy joǵary kóptegen ózge elderdiń oń yqpaly tiip otyr», - dedi ol.
Atalmysh másele boiynsha perspektivalarǵa toqtalǵan V.Pýtin jaqyn ýaqytta bul aimaqta lańkesterdiń kózi joiylatynyn aitty. Sonymen qatar, deeskalatsiia aimaqtaryn qurýdan keiin kelesi kezeńge ótý kózdelip otyrǵanyn jetkizdi.
«Barlyq etnikalyq jáne dini toptar, úkimet pen oppozitsiia qatysý úshin Siriia halqynyń kongresin qurý ideiasy bar. Bul saiasi retteýdiń kelesi mańyzdy qadamy bolar edi», - dep túidi RF Prezidenti.
