Reseide jumyssyz apta merzimi 12 mamyrǵa deiin sozylady. Bul týraly koronavirýsqa bailanysty úkimet jáne aimaq basshylarymen jinalys ótkizgen Resei prezidenti Vladimir Pýtin málimdedi. Pýtin elde koronavirýs ahýaly turaqtaldy, biraq qaýipti kezeń áli alda dep sanaidy.
Azamattar erejelerdi neǵurlym qatań saqtasa, soǵurlym jyldam qalypty ómirge oralady dedi prezident.
"Sharyqtaý shegi áli bolǵan joq. Epidemiianyń eń kúrdeli kezeńine taiadyq" dedi Pýtin.
28 sáýir kúngi otyrysta ol sonymen birge 5 mamyrǵa deiin úkimet oqshaýlaý rejiminen birtindep shyǵý josparyn daiyndaidy dep aitty. Biraq keibir aimaqtarda qatań shekteý sharalary 11 mamyrdan keiin de kúshinde qalýy múmkin dedi.
Pýtinniń sózine qaraǵanda koronavirýs indeti kásipkerlerge aýyr tigen. Osyǵan orai prezident úkimetke el ekonomikasyn qalypqa keltirýge múmkindik beretin jańa jospar ázirleýdi tapsyrdy.
Sáýir aiynyń basynda prezident halyqqa málimdeme jasap, azamattardy oqshaýlaý rejimin saqtaýǵa shaqyrǵan edi jáne aldaǵy eki-úsh aptanyń eń sheshýshi kezeń bolatynyn aitqan.
"Bári ótedi jáne bul da ótip ketedi. Elimiz kóptegen synaqty bastan keshirgen: kezinde pechenegter de, "polovetster" de qysqan - Resei bárin jeńdi. Bul koronavirýsty da jeńemiz" degen edi.
Sońǵy málimet boiynsha, Reseide 93,5 myńnan astam adamnan koronavirýs tabylǵan. 867 naýqas qaitys bolǵan.
