Vladimir Pýtin 2018 jyly jańa prezidenttik merzimge sailaýǵa túsedi. Bul týraly memleket basshysynyń ózi Nijnii Novgorodtaǵy GAZ avtozaýytynyń 85 jyldyq mereitoiyna orai ótken eńbekkerler jáne ardagerlermen kezdesýde málimdedi, dep habarlaidy "Ult aqparat" TASS agenttigine silteme jasap.
«Iá, men Resei Federatsiiasy prezidenti sailaýyna túsemin», - dep málim etti ol.
Resei basshysynyń sózin estigen kezdesýge qatysýshylar dý qol shapalaqtady. «Mundai qoldaý kórsetkenderińizge rahmet», - dedi Pýtin zaýyt ujymyna óz rizashylyǵyn bildirip.
«Sizderdiń jumystaryńyzǵa, elimizge degen kózqarastaryńyzǵa alǵys aitamyn»,- dep jalǵastyrdy ol.
«Biz birge bolsaq, bári de jaqsy bolady», - dep atap ótti RF prezidenti.
Eske sala ketsek, Vladimir Pýtinniń ókilettik merzimi 2018 jyly aiaqtalady.
Sonymen qatar, 2017 jyly Pýtin sailaýǵa túsý týraly saýaldarǵa jaýap bermei kelgen. 65 jastaǵy saiasatker Reseidi 1999 jyldyń sońynan beri basqaryp otyr. Ol 13 jyl prezident, tórt jyl premer-ministr qyzmetin atqardy. Onyń aldynda Pýtin Reseidiń Federaldyq qaýipsizdik qyzmetiniń basshysy bolǵan.
Reseidegi 2018 jylǵy prezident sailaýyna qatysýǵa telejúrgizýshi Kseniia Sobchak, "Iabloko" partiiasynyń jetekshisi Grigorii Iavlinskii, LDPR tóraǵasy Vladimir Jirinovskii men biznesmen Sergei Polonskii niet bildirgen. Sailaýǵa oppozitsiialyq saiasatker Aleksei Navalnyidyń da túskisi kelip edi, biraq bilik onyń buryn jaýapqa tartylǵanyn aityp tirkemedi. Navalnyi soǵan qaramastan sailaýaldy úgit-nasihat kampaniiasyn jalǵastyryp jatyr.
