Prezident Vladimir Pýtin Resei azamattary ishinara áskerge alynatynyn habarlady.
"Men Resei Federatsiiasynda ishinara mobilizatsiia týraly usynysty qoldaý qajet dep sanaimyn... Bul týraly jarlyqqa qol qoiyldy" dedi ol búgin tańerteń Resei halqyna arnaǵan úndeýinde.
Pýtinniń sózinshe, ásker qataryna tek zapasta turǵan, áskeri bilimi men tájiribesi bar azamattar alynady, mobilizatsiia 21 qyrkúiekten, iaǵni búginnen bastalady.
Reseide ekinshi dúniejúzilik soǵystan beri ishinara áskerge alý sharasy bolmaǵan.
Prezident ishinara áskerge alý týraly málimdemeni Ýkrainanyń shyǵysyndaǵy Herson oblysy men Zaparoje oblysynyń bir bóligindegi reseishil separatisterdiń Reseige qosylý týraly referendým ótkizer kúndi belgilegen soń jasap otyr. "Referendým" 23-27 qyrkúiekte ótýi múmkin. Ýkraina tarapy mundai "referendýmdy" moiyndamaitynyn birneshe ret qaitalaǵan.
Pýtin halyqqa úndeýinde "Resei referendým qaýipsizdigin qamtamasyz etý úshin qolynan kelgenniń bári jasaidy", "Batys ábden shekten shyqty. Jaýapsyz saiasatkerler Reseige shabýyl jasaý úshin Ýkrainaǵa qajetti qarý berýge shaqyryp jatyr" dep málimdedi.
Keshe, 20 qyrkúiekte, Resei memlekettik dýmasy Qylmystyq kodekske "mobilizatsiia", "soǵys jaǵdaiy", "soǵys ýaqyty" degen uǵymdardy jyldamdatyp engizgen. Ýkrainanyń Harkov qalasy mańyndaǵy jeńilisterinen keiin Reseide jappai áskerge alý týraly sóz kóbeie bastaǵan.
