5 sáýirde Resei prezidenti Vladimir Pýtin ózine 2036 jylǵa deiin bilikte qalýǵa múmkindik beretin daýly zań jobasyna qol qoidy. Parlamenttiń qos palatasy jýyqta maquldaǵan joba sailaý jáne referendým týraly zańnamany Konstitýtsiiaǵa engizilgen ózgeristerge sáikestendiredi.
Engizilgen ózgeriske sáikes, "bir adam prezident qyzmetin eki merzimnen artyq atqara almaidy" degen norma qazirgi memleket basshysyna da qoldanylady, biraq onyń buǵan deiingi prezident bolǵan merzimi esepke alynbaidy. Demek Pýtin taǵy eki merzim prezident qyzmetin atqarýǵa haqyly bolmaq.
Jańa ózgerister boiynsha, jasy 35-ten asqan, Resei aýmaǵynda kemi 25 jyl turaqty turatyn, shetel azamattyǵy joq jáne eshqashan bolmaǵan, ózge elde yqtiiarhatpen de turmaǵan adam Resei prezidenti bolyp sailana alady. Degenmen memleket ne onyń bóligi Resei quramyna keiin qosylsa, onda turatyn adamnyń azamattyǵyna qatysty bul talaptar qoldanylmaidy.
Resei prezidenti Konstitýtsiiaǵa ózgeris engizý týraly bastamany byltyr qańtarda kótergen. Naýryzda is júzinde Pýtinniń 2036 jylǵa deiin prezident bolýyna múmkindik beretin normalary bar zań jobasyn memlekettik dýma birinshi oqylymda maquldady. Keiin bul joba birneshe kún qatarynan ótip, 1 shildede aiaqtalǵan referendýmda bekitildi. Jalpyulttyq referendým narazylyqtyń tutanýyna túrtki boldy, arnaiy jasaq narazylardy kúshpen taratty.
Resei biligi shetel agenti tizimindegi kommertsiialyq emes uiym qataryna qosqan "Levada-tsentr" ortalyǵynyń zertteýine sáikes, reseilikterdiń 41 paiyzy Pýtinniń 2024 jyldan keiin prezident bolǵanyn qalamaidy. Pýtinniń qaita sailanǵanyn qalamaityndardyń jartysyna jýyǵy onyń uzaq otyrǵanyn, jurtty jalyqtyrǵanyn jáne zeinetke ketýi tiis ekenin aitqan.
5 sáýirde Vladimir Pýtin budan bólek, memleket basshysyna azamattyq tulǵalardy joǵary laýazymdy áskeri qyzmetke taǵaiyndaýǵa ókilet beretin qujatqa qol qoidy.
