Qazaqstannyń Tuńǵysh Prezidentiniń atyna Elorda kúni men Nursultan Nazarbaevtyń 80 jyldyq mereitoiyna orai kóptegen hattar kelip túsýde, - dep habarlaidy elbasy.kz.
Resei Federatsiiasynyń Prezidenti Vladimir Pýtin Elbasyna arnaiy beinequttyqtaý joldady.
«Men bizdiń kópjyldyq dostyǵymyzdy qadirleimin jáne maqtan tutamyn. Alǵashqy kezdesýimizden bastap aramyzda ashyqtyǵymen jáne kez kelgen kúrdeli máselelerdi birlesip sheshýge daiyn bolýymyzben erekshelenetin shynaiy joldastyq qarym-qatynas ornady. Sizdiń danalyǵyńyz ben kóregendigińizdi, zor jaýapkershiligińiz ben salmaqtylyǵyńyzdy, ómirlik jáne basqarý tájiribeńizdi barsha jurt moiyndady. Siz óz elińizde jáne Reseide, sondai-aq búkil álemde kórnekti memleket qairatkeri jáne naǵyz kóshbasshy retinde joǵary bedelge ie boldyńyz. Osy jyldardyń ishinde Siz ulttyq kelisimdi, tarihi, mádeni dástúrlerdi saqtai otyryp, Qazaqstannyń turaqty damýyna, bolashaqqa nyq senimmen qadam basýyna zor eńbek sińirdińiz», - dedi Vladimir Pýtin.
Ózbekstan Respýblikasynyń Prezidenti Shavkat Mirziioev óz hatynda Memleket basshysy retindegi uzaq merzimdi jáne jemisti qyzmeti barysynda Elbasy tek Qazaqstanda ǵana emes, halyqaralyq arenada da zor qurmet pen bedelge ie bolǵanyn atap ótti.
«Siz eń kúrdeli tarihi kezeńde eldi tiimdi basqardyńyz, Qazaqstannyń jańa tarihy men taǵdyry Sizdiń atyńyzben tyǵyz bailanysty. Zor kúsh-jigerińizdiń, parasatty jáne kóregen basshylyǵyńyzdyń arqasynda Qazaqstan Respýblikasy óziniń úlken ekonomikalyq jáne ziiatkerlik áleýetin tiimdi paidalanyp, búginde álemdegi eń qarqyndy damyp kele jatqan elderdiń birine ainaldy», - delingen jedelhatta.
Ispaniia Koroli Felipe jedelhatynda Nursultan Nazarbaevtyń Qazaqstan Respýblikasynyń qalyptasýy men damýyna, halyqtyń ál-aýqatyn qamtamasyz etýge qosqan úlesin erekshe atap ótti.
«Osy múmkindikti paidalana otyryp, Sizge Ispaniiaǵa degen erekshe kóńilińiz ben bizdiń elderimizdiń arasyndaǵy berik qatynastarǵa qol jetkizýge qosqan jeke úlesińiz úshin alǵys aitamyn. Sondai-aq Sizge zor qurmetimdi bildiremin», - delingen Ispaniia Koroliniń quttyqtaýynda.
Monako kniazi II Alber Elbasyn mereitoiymen quttyqtap, Nursultan Nazarbaevqa jáne Qazaqstan halqyna myqty densaýlyq pen baq-bereke tiledi.
Moldova Respýblikasynyń Prezidenti Igor Dodon Qazaqstannyń Tuńǵysh Prezidentiniń joǵary saiasi bedeli aldaǵy ýaqytta da eldiń turaqty damýyna qyzmet etetinine senim bildirdi.
Chehiia Respýblikasynyń Prezidenti Milosh Zeman óziniń jedelhatynda Nursultan Nazarbaevtyń táýelsiz Qazaqstannyń damýy jolyndaǵy sińirgen eńbegin atap ótti.
«30 jyldyń ishinde Sizdiń basshylyǵyńyzben Qazaqstan kóptegen jetistikke qol jetkizdi. Bizdiń elderimizdiń arasynda uzaq ýaqyttan beri dostyq qarym-qatynastyń jalǵasyp, kóptegen salalardaǵy yntymaqtastyq eki jaqqa da paidasyn tigize otyryp, damyp jatqandyǵyna óte qýanyshtymyn», - delingen Milosh Zemannyń jedelhatynda.
Aýǵanstan Islam Respýblikasynyń Prezidenti Ashraf Ǵani óz jedelhatynda Elbasynyń ekijaqty qatynastardy damytýǵa jáne memleketaralyq yntymaqtastyqty nyǵaitýǵa qosqan erekshe úlesin atap ótti.
Izrail Memleketiniń Premer-Ministri Biniamin Netaniahý Elbasyn mereitoiymen quttyqtap, eki el arasyndaǵy qatynastardyń odan ári nyǵaia túsetinine senim bildirdi.
«Sizdiń basshylyǵyńyzben Qazaqstan Respýblikasy kópsalaly ekonomikasy bar zamanaýi, jarqyn elge ainaldy. Bul shyn mánisinde Ortalyq Aziia jáne odan tys jerler úshin óte mańyzdy faktor. Men Sizge uzaq ǵumyr, densaýlyq pen baq-bereke tileimin», - delingen jedelhatta.
