Foto: Qyrǵyzstan Respýblikasy Prezidentiniń baspasóz qyzmeti
Resei prezidenti Vladimir Pýtin qyrǵyz áriptesi Sadyr Japarovty ekijaqty yntymaqtastyqty tereńdetý boiynsha baǵdarlardy naqtylaýǵa shaqyrdy, dep habarlaidy RIA Novosti.
"Búgin biz kóp qyrly ekijaqty kún tártibin muqiiat qarastyryp, jan-jaqty yntymaqtastyǵymyzdy odan ári tereńdetý boiynsha baǵdarlardy naqtylai alamyz", - dedi Pýtin.
Ekijaqty kelissózder barysynda Reseidiń Qyrǵyzstanda mektepter salý máselesi kóterildi. Pýtinniń aitýynsha, Qyrǵyzstanda orys tilinde oqytatyn alǵashqy úsh mektep 2027 jyldyń 1 qyrkúieginde ashylady.
"2023 jyly biz Qyrǵyzstanda orys tilinde oqytatyn toǵyz orta mektep salý boiynsha iri birlesken jobany bastadyq. Alǵashqy úsh mektep 2027 jyldyń 1 qyrkúiegine deiin ashylýy kerek", - dedi Pýtin.
Resei prezidentiniń aitýynsha, "Sheteldegi Resei muǵalimi" baǵdarlamasy aiasynda Qyrǵyzstandaǵy 42 mektepte 157 reseilik pedagog jumys isteidi.
Ekonomika týraly aita kele, Pýtin Qyrǵyzstanda Reseidiń qatysýymen 1500-den astam kásiporyn jumys isteitinin aitty.
Pýtinniń aitýynsha, 2024 jyly eki el arasyndaǵy saýda 13,6%-ǵa ósip, rekordtyq 4,1 milliard dollarǵa jetti.
"2025 jyldyń qańtar-qyrkúiek ailarynda ol taǵy 17%-ǵa ósti", - dedi Resei prezidenti.
Vladimir Pýtin sonymen qatar Sadyr Japarovpen kelissózderinen keiin negizgi qujattar paketine qol qoiylatynyn málimdedi.
"Saýda-ekonomikalyq, bilim berý, kóshi-qon jáne basqa da salalardaǵy negizgi úkimetaralyq jáne vedomstvoaralyq qujattar paketine qol qoiylady", - dedi Pýtin.
