Búgin Resei prezidenti Vladimir Pýtin AQSh-tyń sanktsiialar týraly zańynyń jalǵasy retinde jariialaǵan «jańa tizimin» «dostyq áreket emes» dep baǵalady. Máskeýde óziniń sailaýaldy kompaniiasyna arnalǵan jiynda Pýtin Kreml AQSh-qa jaýap retinde áldebir qadamdar josparlamaitynyn aitty, dep habarlaidy Azattyq.
Qańtardyń 30-y AQSh Qarjy ministrligi Resei prezidenti Vladimir Pýtinge jaqyn delingen jáne bolashaqta sanktsiia salynýy múmkin adamdardyń «Kreml esebi» dep atalatyn tizimin jariialaǵan. Qujatqa reseilik 144 joǵary laýazymdy qyzmetker men 96 "oligarh" engizilgen.
«Pýtinniń tizimi» dep atalǵan beiresmi tizimde Resei premer-ministri Dmitrii Medvedev pen Syrtqy ister ministri Sergei Lavrov bar. Tizimde Federatsiia keńesiniń basshysy, Memlekettik Dýma tóraǵasy, Syrtqy barlaý qyzmetiniń direktory, Tergeý komitetiniń tóraǵasy, FSB basshysy jáne Máskeý meriniń aty-jóni kórsetilgen.
Oligarhtar men biznesmenderden Alisher Ýsmanov, Roman Abramovich, Sýleiman Kerimovter tizimge ilikken.
"Kreml esebine" qamtylǵan sheneýnikter men oligarhtarǵa bolashaqta sanktsiia salynýy múmkin. Alaida AQSh prezidenti Donald Tramptyń ákimshiligi ázirge jaqyn arada ondai shara bolmaitynyn aitady.
