Qazaqstan men Reseidiń Óńiraralyq yntymaqtastyǵynyń XV forýmynda RF Prezidenti Vladimir Pýtin týrizm salasynda yntymaqtastyqty damytý baǵyttaryn atady, dep habarlaidy QazAqparat.
«Qazaqstan men Resei ekonomikalyq operatorlary arasyndaǵy barlyq esep aiyrysýdyń 63 paiyzy ulttyq valiýtada iske asyrylady. Jaqyn arada bul kórsetkish 75 paiyzǵa jetedi dep úmittenemiz», - dedi V. Pýtin.
Sonymen qatar ol mádeniet, bilim berý salalarynda bailanystar nyǵaiyp kele jatqanyn atap ótti. Reseidiń 76 sýbektisi Qazaqstannyń 14 oblysymen qarym-qatynasty ornatty.
«Jyl saiyn tikelei óńiraralyq qatynastardyń qarqyny artyp keledi. Qańtar-qazan aralyǵynda Qazaqstanǵa 50-den astam reseilik aimaqtyq delegatsiialar keldi. Osy oraida ondaǵan biznes-missiialar, jastar baǵdarlamalary uiymdastyryldy, iaǵni ǵylym, bilim jáne mádeniet salalaryna arnaldy», - dedi RF basshysy.
Onyń paiymynsha, eki el arasynda týrizmdi damytýǵa erekshe ekpin qoiý kerek.
«Týristik indýstriia eleýli ekonomikalyq áleýetke ie. Reseide ishki jáne syrttan keletin týrizmge qatysty úlken jumystar atqarylýda. Sonymen qatar eki el arasynda týristik almasý deńgeii artyp keledi. Reseige jyl saiyn 3,6 mln qazaqstandyq, Qazaqstanǵa 3 mln reseilik saparlaidy. Bul kórsetkishter aldaǵy ýaqytta arta túsedi dep senimdimin», - dedi Vladimir Pýtin.
RF Prezidentiniń pikirinshe, Qazaqstan men Resei arasynda tarihi-mádeni qundylyqtardy týristerge tanystyratyn baǵyttardy jetildirý kerek.
«Eki eldiń ulttyq, tarihi-mádeni qundylyqtarymen, dástúrmen týristerdi tanystyratyn tiisti baǵdarlardy qurǵan durys bolar edi. Sonymen qatar eskertkishtik, memorialdyq oryndarǵa saparlaýǵa elderimiz azamattarynyń qyzyǵýshylyǵyn yntalandyrǵan abzal», - dedi ol.
«Forýmǵa qatysýshylardyń barlyǵyna belsendi birlesken jumys úshin alǵysymdy aitqym keledi. Kelesi jyly Óńiraralyq forýmdy ótkizý kezegi Reseige túsip tur. Osy oraida sizderdi Omby qalasyna jinalýǵa shaqyramyn», - dep túidi kórshi memleket basshysy.
