Resei prezidenti Vladimir Pýtin 6 qyrkúiekte Ózbekstanǵa qaitys bolǵan prezident Islam Karimovty eske alý úshin baratynyn málimdedi. Pýtin Karimovtyń ólimin "Ózbekstan úshin orny tolmas qaiǵy" dep atady. Pýtin Qytaida ótken G20 elderiniń sammiti kezinde jýrnalistermen sóileskeninde Ózbekstannyń jańa basshylyǵy eldegi turaqtylyqty saqtap qala alatynynan úmitti ekenin bildirdi.
Ózbekstan prezidenti Islam Karimovtiń 78 jasynda insýltten qaitys bolǵany qyrkúiektiń 2-si kúni habarlandy. Ony Samarqandaǵy Hazret Qyzyr meshiti aýlasyndaǵy Shahi-Zinda beiitinde, ata-anasynyń janyna qyrkúiektiń 3-i kúni jerledi.
Burynǵy kommýnist Islam Karimov Ózbekstandy 27 jyl boiy basqardy. Karimovtiń kezinde saiasi dissidentter men azamattyq belsendilerdi arnaiy qaýipsizdik jáne barlaý organdary aiaýsyz qýdalap, janyshtaýmen boldy.
"Onyń eli úshin ne istegenin áli de baǵalaý kerek. Ózbekstannyń jańa zaman tarihyndaǵy túrli sátterin ártúrli baǵalaýǵa bolady, biraq ol elde turaqtylyq pen ilgeri damýdy saqtady" dedi Pýtin Karimov týraly.
Resei prezidenti sonymen qatar "Bul Ózbekstan siiaqty el úshin óte mańyzdy, munyń Ózbekstannyń ózin-ózi saqtaýy jáne keleshekte ilgeri damýy úshin ómirlik mańyzy bar" dedi. Pýtin buǵan qosa Resei men Ózbekstan arasyndaǵy jaqsy qarym-qatynas saqtalady degen úmitte ekenin bildirdi.
"Azattyq"
