Resei kóshbasshysy Vladimir Pýtin ómirden ozǵan Ózbekstan Respýblikasynyń tuńǵysh prezidenti Islam Kárimovtiń otbasyna kóńil aityp, marqumnyń arýaǵyn eske alý úshin ózbek jerine arnaiy ushyp bardy, dep habarlaidy Baq.kz TASS-qa silteme jasap.
Ózbekstanǵa kelip jetken Pýtin aldymen Shahi Zinda mazarynyń qasynda jerlengen Kárimovtiń ziratyna baryp, gúl shoǵyn qoidy.
Odan bólek, prezident ózbek kóshbasshysynyń otbasyna – jary Tatiana Kárimovaǵa jáne onyń kenje qyzy Lola Kárimova-Tilliaevaǵa kóńil aityp, qaiǵysyna ortaqtasty.
Pýtinniń Ózbekstanǵa keletini jaily tek keshe ǵana belgili bolǵan. Resei kóshbasshysynyń kómekshisi Iýrii Ýshakov jýrnalisterge onyń jeke maqsattaǵy sapar ekenin naqtylap, túsindirdi.
Óz kezeginde, Pýtin Kárimovpen «dostyq qarym-qatynasta bolǵanyn» aityp, Ózbekstannyń jańa biligimen aradaǵy bailanys sondai kúide saqtalatynyna senim bildirdi.
Esterińizge sala keteiik, 3 qyrkúiekte Resei prezidentiniń baspasóz hatshysy Dmitrii Peskov jumys kestesiniń tyǵyzdyǵyna bailanysty Pýtin Kárimovti jerleý rásimine qatysa almaitynyn málimdedi. Sol kezde Vladivostokta júrgen Pýtinniń tapsyrmasymen Kárimovpen baquldasý sharasynda Resei delegatsiiasyn eldiń premer-ministri Dmitrii Medvedev bastap bardy.
