Resei prezidenti Vladimir Pýtin reseilik internet segmentin oqshaýlaý týraly zańǵa qol qoidy. Quqyqtyq aqparat saitynda jariialanǵan qujat 1 qarashadan bastap kúshine enedi, dep habarlady Azattyq.
Joba avtorlary buǵan deiin qujat búkilálemdik internet ajyrap qalǵan jaǵdaida Resei internetiniń turaqty jumys isteýin qamtamasyz etedi dep aitqan. Onyń atqarylý barysyn Roskomnadzor qadaǵalaidy, al operator jelilerinde qorǵaý quraldaryn ornatý men paidalaný tártibin Resei úkimeti bekitpek.
Zań jobasy avtorlarynyń aitýynsha, qujat "2018 jyly qyrkúiek aiynda qabyldanǵan AQSh-tyń ulttyq kiberqaýipsizdigi boiynsha strategiiasynyń agressivti sipattaryn eskere otyryp" ázirlengen.
Zań jobasyna qarsy azamattar "avtonomdy jeli" internette jappai tsenzýranyń paida bolýyna yqpal etýi múmkin dep qaýiptenedi. Halyqaralyq quqyq qorǵaý uiymdary Vladimir Pýtindi zańǵa qol qoimaýǵa shaqyrǵan. "Shekarasyz tilshiler" jáne Human Rights Watch uiymdarynyń birigip jasaǵan málimdemesinde qujat Resei qol qoiǵan Adam quqyǵy boiynsha Eýropa konventsiiasy men BUU-nyń azamattyq jáne saiasi quqyqtary týraly pakti sharttaryn buzady dep jazylǵan.
Buǵan deiin birqatar internet-kompaniialar da qujatty synap, onyń atqarylýy barysynda qoldanylatyn tehnologiia "servis jumysyn baiaýlatady" dep eskertken. Zańǵa qarsy keibir azamattar kóp qarjyny talap etetin zań jobasy erte me, kesh pe ózge maqsatta qoldanylýy múmkin dep alańdaǵan.
