RF Prezidenti Vladimir Pýtin juma kúni Grýziiaǵa jolaýshy tasymaldaityn áýe qatynasyna tyiym salatyn Jarlyqqa qol qoidy. Tyiym 8 shildeden bastap kúshine enedi, dep jazdy TASS agenttigi.
«2019 jyldyń 8 shildesinen bastap reseilik áýe kompaniialarynyń azamattardy Resei Federatsiiasynyń aýmaǵynan Grýziia aýmaǵyna tasymaldaýyna (sonyń ishinde kommertsiialyq) ýaqytsha tyiym salynady», - delingen qujatta.
Jarlyq mátininde týristik agenttikter men týroperatorlaryna tyiym kúshinde turǵan ýaqytta azamattarǵa týristik ónimderdi satpaýǵa keńes berilgen. Pýtin RF úkimetine ýaqytsha Grýziiada júrgen reseilik azamattardyń Otanyna qaitý sharalaryn qarastyrýdy tapsyrdy.
Qujatta aitylǵandai, Jarlyqqa «Resei Federatsiiasynyń ulttyq qaýipsizdigin, Resei Federatsiiasy azamattaryn qylmystyq jáne basqa da quqyqqa qaishy áreketterden qorǵaý maqsatynda» qol qoiylǵan.
