.jpg)
Táýelsizdik kúnine orai Qazaqstan Prezidentiniń atyna kelip túsken quttyqtaý jedelhattary Aqorda saitynda jariialandy, dep habarlaidy Ult.kz.
Onda Qazaqstanmen kórshiles Orta Aziia elderi prezidentteriniń quttyqtaýlary bar jáne Ýkraina prezidenti Vladimir Zelenskii de elimizdiń basshysyna jedelhat joldaǵan eken. Alaida jaqynda Qazaqstanǵa memlekettik issaparmen kelip ketken kórshiles Resei prezidenti Vladimir Pýtin quttyqtaý joldaǵandar tiziminde joq.
Aqordanyń resmi saitynda jazylǵan aqparat boiynsha, Qazaqstan Respýblikasynyń Táýelsizdik kúnine orai Prezident Qasym-Jomart Toqaevtyń atyna shet memleketterdiń basshylary men halyqaralyq uiymdardyń jetekshilerinen quttyqtaý jedelhattary kelip túsip jatyr.
Ózbekstan Prezidenti Shavkat Mirziioev Qasym-Jomart Toqaevty jáne Qazaqstan halqyn Táýelsizdik kúni merekesimen quttyqtady.
– Júzdegen jyldardan beri tatý kórshi ári dos sanalatyn eki el arasyndaǵy ózara senim, qurmet jáne qoldaý rýhyndaǵy strategiialyq seriktestik pen odaqtastyq qarym-qatynas qarqyndy dami beretinine senimdimin, – delingen jedelhatta.
Qyrǵyzstan Prezidenti Sadyr Japarov táýelsiz Qazaqstannyń memleket basqarý, áleýmettik-ekonomikalyq damý men belsendi syrtqy saiasat júrgizý isterinde aitarlyqtai tabysqa qol jetkizgenine toqtalǵan.
– Elderimizdiń arasyndaǵy san ǵasyrlyq dostyqqa, tatý kórshilikke jáne strategiialyq seriktestikke negizdelgen bailanystyń aldaǵy ýaqytta da órlei beretinine kámil senemin, – dep jazylǵan jedelhatta.
Tájikstan Prezidenti Emomali Rahmon quttyqtaýynda qazaq-tájik bailanysynyń qarqyndy sipatyn joǵary baǵalady.
– Biz ózara tiimdi yqpaldastyqty dáiekti túrde ilgeriletýge basa mán beremiz. Sonymen qatar memleketterimizdiń basty múddesine sai eki el arasyndaǵy yntymaqtastyqty damytý úshin naqty qadamdar jasaýǵa daiynbyz, – dep jazǵan Tájikstan Prezidenti.
Túrikmenstan Prezidenti Serdar Berdimuhamedov Memleket basshysy men Qazaqstan halqyn Táýelsizdik kúni merekesimen quttyqtap, ekijaqty bailanys barlyq baǵyt boiynsha tabysty órlei túskenine nazar aýdarǵan.
– Bul oraida Sizdiń jaqynda Túrikmenstanǵa jasaǵan resmi saparyńyz erekshe mańyzǵa ie. Ashhabadta júrgizgen kelissózder aiasynda qol jetkizilgen ýaǵdalastyqtar elderimiz arasyndaǵy qarym-qatynasty odan ári damytýǵa aitarlyqtai úles qosaryna senimim mol, – dep jazylǵan jedelhatta.
Memleket basshysyna sondai-aq Túrikmenstan Halk Maslahatynyń tóraǵasy Gýrbangýly Berdimuhamedov te quttyqtaýyn joldaǵan.
Sonymen qatar Qazaqstan Respýblikasynyń Táýelsizdik kúnine orai jedelhattaryn BAÁ Prezidenti sheih Muhammed Ben Zaid Ál Nahaian, BAÁ Vitse-prezidenti, Premer-ministri, Dýbai ámirshisi sheih Muhammed ben Rashid Ál Maktým, Saýd Arabiiasynyń Koroli, Qos kieniń saqshysy Salman ben Abdýlaziz Ál Saýd, Saýd Arabiiasy Koroliniń Taq murageri, Ministrler keńesiniń tóraǵasy Muhammed ben Salman ben Abdýlaziz Ál Saýd, Ýkraina Prezidenti Vladimir Zelenskii, Palestina Prezidenti Mahmýd Abbas, Liviia Prezidenttik keńesiniń tóraǵasy Muhammed Iýnýs ál-Manfi, TMD Bas hatshysy Sergei Lebedev, TMU Bas hatshysy Kýbanychbek Ómiráliev, Tatarstan Raisy Rústem Minnihanov jáne basqalary joldady.
