Resei prezidenti Vladimir Pýtin Djo Baidendi AQSh-taǵy prezident sailaýynda jeńiske jetýimen quttyqtady. Álem elderiniń basshylary qarasha aiynyń basynda sailaýdyń aldyn ala qorytyndysy belgili bolǵannan keiin Baidendi quttyqtai bastaǵan. Osyǵan deiin quttyqtaýdyń keshigýine bailanysty túsinikteme bergen Kreml "sailaýdyń resmi qorytyndysyn kútip otyrǵanyn" aitqan edi.
14 jeltoqsanda AQSh-ta sailaýshylar alqasy Djo Baidenniń jeńiske jetkenin rastady. Baiden sailaýshylar alqasynyń 306 daýysyn alǵan, al qarsylasy, qazirgi prezident Donald Tramp 232 daýysqa ie bolǵan.
2016 jylǵy sailaý kezinde Pýtin sailaý aiaqtalǵannan keiin birneshe saǵattan soń Trampty quttyqtaǵan. Biraq ol kezde Tramptyń qarsylasy Hillari Klinton onyń jeńisin moiyndaǵan. Al Tramp áli kúnge deiin Baidenniń jeńisin moiyndamady.
Kreml saityndaǵy aqparat boiynsha, Pýtin jańadan sailanǵan prezidentke "sáttilik tilep, álem qaýipsizdigi men turaqtylyǵyna erekshe jaýapty Resei men AQSh birqatar kelispeýshilikterge qaramastan álemdegi máselelerdiń sheshilýine yqpal ete alady" dep úmit bildirgen. Ol sonymen birge jańa sailanǵan prezidentpen "qarym-qatynas ornatýǵa" ázir ekenin aitqan.
Baiden Barak Obbama tusynda vitse-prezident bolyp turǵan kezinde Pýtindi synap, Máskeýdiń Ýkraina men kórshi elderge saiasatyn teris baǵalaǵan. Ol sonymen birge aqpan aiynda merzimi aiaqtalatyn iadrolyq strategiialyq shabýyl qarýlaryn qysqartý jáne shekteý jónindegi sharalar týraly kelisimdi (SNV-3) uzartýdy qoldaǵan.
14 jeltoqsanda sailaýshylar alqasynyń daýys berýi aiaqtalǵannan keiin Baiden úndeý jasap, Amerika halqyn birlikke shaqyrǵan.
"Amerikada bilikti almaidy - ony adamdardyń ózderi tapsyrady. Bul elde demokratiia alaýy jaǵylǵannan beri kóp ýaqyt ótti. Endi biz eshteńeniń de, tipti indet pen bilikti asyra paidalaný da bul alaýdy óshire almaitynyna senimdimiz" dedi Baiden.
Baiden inaýgýratsiiasy 20 qańtarda ótedi.
