Foto: Aleksandr Demianchýk/TASS
Resei prezidenti Vladimir Pýtin "Rossiia-1" telearnasyna bergen suhbatynda "Batys Reseidi bólshektegisi keledi" dep málimdedi.
21 aqpandaǵy joldaýynan keiingi suhbatynda "Batystyń maqsaty – burynǵy Sovet Odaǵy men onyń negizgi bóligi Resei Federatsiiasyn bólshekteý. Sodan keiin ǵana olar ózderi jii aitatyn "órkenietti halyqtar otbasyna" qabyldaityn bolar, biraq áýeli bólshektep almaqshy" dedi Pýtin.
Onyń sózinshe, orys halqy eshqashan qazirgidei bir bútin ómir súre almaidy, "Máskeý orystary", "Oral orystary" bolyp ydyrap ketedi. "Munyń bári – qaǵazǵa jazylǵan anyq jospar" dedi ol.
Sóz arasynda Pýtin NATO-ny da Ýkrainaǵa qarý berip otyr dep aiyptady.
RF prezidenti osyǵan uqsas boljamdaryn buǵan deiin de birneshe ret aitqan. AQSh-tyń burynǵy memlekettik hatshysy Madlen Olbrait aitty deitin "Sibir bailyǵynyń bári bir elge tiesili bolǵany ádil emes" degen sózdi qaitalaǵan. 2000-jyldardyń basynan beri Rýnette júrgen mundai sózdi AQSh saiasatkeri aitqan emes.
Pýtin Resei halqy "Máskeý, Oral orystary" bolyp bólinip ketýi múmkin ekenin alǵash ret jariia túrde aitty.
Onyń "qaǵazǵa jazylǵan jospar" degende neni meńzegeni belgisiz. Mundai konspirologiialyq teoriialardyń ishindegi eń belgilisi – Dalles jospary. Bul teoriiaǵa qaraǵanda, AQSh-tyń SSSR-ge arnalǵan josparynda "eshkimge baǵynbaityn halyqty birtindep joiyp jiberý kózdelgen". Mundai jospar bar ekenine eshbir dálel joq.
Ýkrainaǵa qoldaý kórsetken Batys elderiniń jetekshileri Reseidi bólshekteýge tyryspaitynyn aityp keledi. Muny taiaýda Varshavada sóz sóilegen AQSh prezidenti Djo Baiden de ashyq málimdedi.
"Ýkrainamen soǵysta jeńilse, Resei ydyrap ketýi múmkin" degen boljam – baspasózde, akademiialyq ortada sóz bolyp júrgen nusqalardyń biri. Muny Reseidegi túrli ulttardyń óz-ózin basqarǵanyn qalaityn emigratsiiadaǵy qoǵamdyq uiymdar da jii aitady. Alaida Batys elderi mundai ideiany qoldaǵan emes.
