Resei Prezidenti Vladimir Pýtin 2 jeltoqsanda "Shetel agentteri" týraly zań dep atalyp ketken qujatqa engiziletin túzetýlerdi maquldady. Kei sarapshylardyń aitýynsha, bul zań aqparat quraldaryndaǵy pikir alýandyǵy men erkin oidy shekteidi.
Jańa zań "shetel agentteri" tizimine engen uiymdarda jumys isteitin jýrnalisterdi "shetel agenti" dep ataýǵa múmkindik beredi. Mundai ataý sheteldik buqaralyq aqparat quraldarymen áriptestik ornatyp, solardan aqsha alatyn nemese ózge de materialdyq qoldaýǵa ie jeke tulǵalarǵa beriledi.
Eger sheteldik aqparat quraldary Resei zańyn buzsa, qabyldanǵan normalar "shetel agentteri nemese olar jetekshilik etetin zańdy tulǵalardyń saittaryn buǵattaýǵa múmkindik beredi" dep jazdy TASS agenttigi.
"Shetel agentteri" týraly zań Reseide 2012 jyly kúshine engen. Qujatqa sáikes, shetelden qarjylandyrylatyn kommertsiialyq emes uiymdar arnaiy reestrde tirkelýi qajet. Bul zań Vladimir Pýtin bilikke kelgen kezde bolǵan úkimetke qarsy iri narazylyqtan keiin qabyldanǵan. Narazylyq aktsiialaryna bailanysty pikir bildirgen Pýtin Batystyń yqpaly men aqshasy týraly aitqan.
Qujatty synaǵan kei sarapshylar bul zań uiymdar men jýrnalisterdi qaralaýǵa qolaily jaǵdai týǵyzady degen pikirde.
Buǵan deiin on shaqty halyqaralyq baspasózdi qorǵaý jáne quqyq qorǵaý uiymy (Amnesty International, Human Rights Watch, "Shekarasyz tilshiler", "Jýrnalisterdi qorǵaý komiteti", t.b.) Resei biligin zańǵa álgindei túzetý engizýden bas tartýǵa úndegen. Vladimir Pýtinge ashyq hat jazǵan Resei ziialylary álgi zańnan bas tartýǵa shaqyrǵan.
- Shetelden qarjylandyrylatyn aqparat quraldaryn "shetel agenti" dep ataýǵa múmkindik beretin zań 2017 jyly qarasha aiynda qabyldanǵan.
- Resei ádilet ministrligi "Amerika daýysy" jáne Azat Eýropa/Azattyq radiosy mediakorporatsiiasynyń toǵyz redaktsiiasyn "shetel agentteri" qataryna engizgen. Olar: Azat Eýropa/Azattyq radiosy, Azattyqtyń Orys qyzmetiniń "Sibir.Realii", "Faktograf" jáne "Sever.Realii" mediajobalary, "Nastoiashee Vremia" telearnasy, Azattyqtyń Tatar-Bashqurt qyzmeti, Idel.Realii, "Kavkaz.Realii" jáne Azattyqtyń Ýkrain qyzmetiniń "Krym.Realii" jobasy.
-
Buǵan deiin Azat Eýropa/Azattyq radiosynyń prezidenti Djeimi Flai "Shetel agentteri" týraly zańǵa engiziletin túzetýler Azat Eýropa/Azattyq radiosy mediakorporatsiiasy men ózge de sheteldik BAQ jýrnalisterin qýdalaýǵa baǵyttalǵan jáne "Resei azamattaryn tek Kreml maquldaǵan aqparatpen qamtamasyz etý úshin" jasalǵan kezekti qadam dep málimdegen.
