Resei prezidenti Vladimir Pýtin Ýkrainadaǵy "arnaiy áskeri operatsiia" "qajet bolǵanyn" málimdedi. Ol bul sózin Amýr oblysyndaǵy Vostochnyi ǵarysh ailaǵynyń jumysshylarymen kezdesýde aitty, dep habarlaidy Azattyq radiosy.
"Biz, bir jaǵynan, adamdarǵa kómektesip, olardy qutqaryp jatyrmyz. Ekinshi jaǵynan Reseidiń qaýipsizdigin qamtamasyz etý úshin qadamdar jasadyq. Bizde basqa tańdaý bolmaǵany sózsiz. Bul – durys sheshim" dedi Pýtin.
Pýtin Ýkrainada "antireseilik platsdarm" men "neonatsizm qalyptasa bastady" dep sanaidy. Ol "Ýkrainadaǵy "arnaiy operatsiianyń" maqsaty anyq, bul – Donbass halqyna kómektesý" dedi. Resei basshysy "maqsatymyzǵa qol jetkizemiz" dep senedi.
Pýtinniń sózinen soń Ýkraina prezidentiniń keńesshisi Mihail Podoliak tvitterge "dál qazir Mariýpolde kóshpeli krematorii máiitterdi órtep jatyr. Al atystan aman qalǵandar ashtan ólip jatyr. Kimnen "qorǵap" jatyrsyzdar? Ómirden qorǵap jatyrsyzdar ma?" dep jazdy.
Kreml Ýkrainaǵa soǵysyn "arnaiy operatsiia" deidi. Elde "soǵys" sózin qoldanǵandar qýdalanady, qylmystyq jaýapkershilikke tartylýy da múmkin.
Pýtinnyń buiryǵymen Resei áskeri Ýkrainaǵa 24 aqpanda basyp kirgen. Resei basshysy bul basqynshylyqtyń maqsaty Ýkrainany "denatsifikatsiialaý" jáne "demilitirizatsiialaý" degen edi.
Bir jarym aidan beri Ýkrainada aýyr shaiqas júrip jatyr. BUU esebinshe, soǵystan eki myńdai beibit turǵyn qaza bolǵan. Al Ýkraina biligi Mariýpol qalasynyń ózinde ondaǵan myń beibit turǵyn qaza tapty deidi.
Resei 24 aqpannan beri Ýkrainanyń ońtústiginde Herson qalasynyń, Harkov jáne Donbass oblystarynyń bir bóligine baqylaý ornatty, biraq Kiev pen Ýkrainanyń soltústiginen shegindi.
