Densaýlyq saqtaý vitse-ministri — Qazaqstan Respýblikasynyń Bas memlekettik sanitar dárigeri Aijan Esmaǵambetova eldegi shekteý sharalarynyń qalai jeńildegenin túsindirdi, dep habarlaidy QazAqparat.
«Qazirgi epidemiologiialyq jaǵjaiǵa qarai otyryp, eldegi shekteý sharalary jeńildetildi. Onyń ishinde biznes týraly jáne halyq týraly sharalardy erekshe aitýǵa bolady. Bizneske qatysty sharalarǵa kelsek, jasyl jáne sary aimaqta ASHYQ júiesinde jasyl jáne kók mártebesi bar adamdarǵa biznes nysandaryna kirýge ruqsat etildi. Al qyzyl aimaqta – biznes nysandarynyń tolýyn 70 paiyzǵa deiin shekteý salynady, degenmen balalardyń oiyn-saýyq ortalyqtarynda bul shekteý alynyp tastaldy», - dedi Aijan Esmaǵambetova QR DSM uiymdastyrǵan onlain dáriste.
Sonymen birge, bas memlekettik sanitar dáriger el turǵyndary úshin qandai jeńildikter engizilgenin túsindirdi.
«Revaktsinadan ótken nemese vaktsinanyń tolyq kýrsyn alǵanyna 6 ai aspasa, elge keletin QR azamattary PTR testileý tapsyrýdan bosatylady. Taǵy da aita keterligi, koronavirýs naýqasymen jaqyn qarym-qatynasta bolǵan adamdardan KVI aýyr belgileri anyqtalmasa, olarǵa úi karantini men oqshaýlaý alynyp tastaldy», - dedi Esmaǵambetova.
