Foto: ashyq derekkóz
Aqtóbede alaiaqtardyń qurbany bola jazdaǵan áiel birneshe kún boiy uiymdasqan qysymǵa tap bolǵan. Belgisiz tulǵalar ózin túrli qyzmet ókilderi retinde tanystyryp, ony iri kólemde nesie rásimdeýge kóndirýge tyrysqan, dep habarlaidy Polisia.kz.
Oblystyq politsiianyń málimetinshe, aldymen áielge ózin kýrerlik qyzmetkermin dep tanystyrǵan adam habarlasyp, onyń atyna sálemdeme kelgenin aitqan. Senimge kirgen ol rásimdeý úshin telefonǵa kelgen SMS-kodty surap, áielden ony alyp úlgergen.
Kóp uzamai taǵy bir qońyraý túsip, bul joly belgisizder ózderin eGov portalynyń qyzmetkerlerimiz dep tanystyrǵan. Olar áieldiń atyna nesie rásimdelip jatqanyn jáne bank shottarynda kúmándi operatsiialar tirkelgenin alǵa tartqan. Artynsha áńgimege ózin quqyq qorǵaý organynyń qyzmetkerimin degen taǵy bir adam qosylyp, jaǵdaidy ýshyqtyra túsken.
Alaiaqtar birneshe kún boiy áielge psihologiialyq qysym kórsetip, “qarjyny qorǵaý” syltaýymen nesie alýǵa itermelegen. Sonyń nátijesinde jábirlenýshi bankke baryp, nesie rásimdeýge árekettengen.
Alaida bank qyzmetkeri klienttiń kúmándi yqpalǵa túskenin der kezinde baiqap, alaiaqtyq belgilerin anyqtaidy. Bul týraly birden kiberqylmysqa qarsy is-qimyl bólimshesine habar berilgen. Politseiler áieldi bólimshege jetkizip, túsindirý jumystaryn júrgizgen.
Bastapqyda ol aldanǵanyn moiyndamaǵanymen, keiin jaǵdaidy túsinip, alaiaqtardyń arbaýynan qutylǵan. Jedel árekettiń arqasynda shamamen 2 million teńge kólemindegi nesieniń rásimdelýine jol berilmedi.
Quqyq qorǵaý organdary azamattardy saq bolýǵa shaqyrady. Belgisiz adamdarǵa SMS-kodtardy aitýǵa, ózin bank, memlekettik organ nemese politsiia qyzmetkeri retinde tanystyrǵandarǵa senýge bolmaidy. Kúmándi jaǵdaida sóilesýdi dereý toqtatyp, aqparatty tek resmi arnalar arqyly tekserý qajet.
