Foto: teatr baspasóz qyzmeti
Ǵ.Músirepov atyndaǵy Qazaq memlekettik akademiialyq balalar men jasóspirimder teatrynda aqpannyń 21-22 kúnderi «Raechka» qoiylymynyń premerasy ótti. Qoiylym Ǵ.Músirepovtiń Raiaǵa jazǵan hattary negizinde sahnalanǵan, dep habarlaidy Ult.kz.
Shyǵarmanyń avtory – dramatýrg Olga Malysheva, al qoiylymdy sahnalaǵan rejisser – Karina Besolti. Basty keiipkerlerdi talantty ártister Jomart Zeinábil, Anar Ádilova, Aida Jantileýova jáne Shuǵyla Eshenova somdady.
Rejisser Karina Besolti qoiylymdy sintetikalyq teatrǵa jatqyzatynyn aitady, sebebi onda derekti teatrdyń elementteri (hattar), drama, plastikalyq teatr jáne postdramalyq teatr elementteri úilesim tapqan.
"Ártúrli mediýmdardyń sintezi áserli ári kópqyrly kórkem týyndyny qalyptastyrady", - deidi Karina Besolti.
Foto: teatr baspasóz qyzmeti
Basty keiipker basynan ótken oqiǵalar týraly kóp oi tolǵaidy. Ol ómir jolynda kele jatyp, qadam saiyn óz psihikalyq "jaraqattaryn" zertteidi. Onyń alǵan baǵyttary kezdeisoq emes, bári naqty: ómirindegi oqiǵalarǵa negizdelip, kartanyń belgili bir núktesine aparady.
"Bul marshrýttar derekti jáne dramatýrg jasaǵan eki álemdi bailanystyrady. Degenmen, bul – meniń jeke kózqarasym, al kórermen mindetti túrde ózine bir erekshe mán tabady. Árine, «bul neni bildiredi?» degen suraqqa eshbir qate jaýap joq", - deidi spektakl rejisseri.
Foto: teatr baspasóz qyzmeti
Qoiylym Ǵabit pen Raianyń názik sezimderin, shynaiy mahabbatyn sipattaityn hattarǵa negizdelgenimen, rejisser qyz ben boijetken ómirindegi qaltarys-bultarystar onyń keiingi sheshimderine qalai áser etetinin, psihologiialyq turǵyda ony qalai ózgertetinin beineleýge tyrysqan. Degenmen, spektaklden ne oi túiý keregin kórermen ózi sheshýi kerek deidi.
"Kórermen spektaklden ne oi túiý keregin ózi sheshýi kerek. Bul – onyń jaýapkershilik aimaǵy. Bizde daiyn jaýaptar, moral nemese basqa túiin joq. Biz tek ózimiz qalai sezinsek, solai oqiǵany baiandaimyz, suraqtar qoiamyz jáne árbir kórermenge oilanýǵa múmkindik qaldyramyz", - dep túsindirdi Karina Besolti.
Premeramen qatar teatr men Ǵ.Músirepov atyndaǵy murajai-úii jazýshynyń shyǵarmashylyǵyna arnalǵan kórme uiymdastyrdy.
Anara Baýyrjanqyzy
