Prezident Qasym-Jomart Toqaev Ulytaýdaǵy Ulttyq quryltai nege shaqyrtylǵanyn túsindirdi, dep habarlaidy "Ult aqparat" Aqordanyń baspasóz qyzmetine silteme jasap.
«Jańa Qazaqstan bir kúnde nemese bir jylda qurylmaityny anyq. Bul – búkil qoǵamdy ózgertetin kúrdeli ári uzaq úderis. Muny júzege asyrý úshin bir ǵana bilik áreket etse, bul, árine, jetkiliksiz. Búkil el bolyp jumylsaq, kózdegen maqsatymyzǵa jetemiz. Sol sebepti, men Joldaýymda Ulttyq quryltai shaqyrý týraly bastama kóterdim.
Quryltai shaqyrý erteden kele jatqan ata dástúrimiz ekenin jaqsy bilesizder. Babalarymyz mańyzdy máselelerdi osyndai alqaly jiynda talqylaǵan. Halyq ózara aqyldasa otyryp, bir toqtamǵa kelgen. Mundai sheshimder búkil eldi biriktirgen.
Tól tarihymyzda ult taǵdyryn sheshken quryltailar bolǵan. Onyń kóbi halqymyz úshin mańyzdy kezeńde ótkizilgen. Talas quryltaiynan keiin Altyn Orda derbes memleket boldy. Qaraqum jáne Ordabasy quryltailary jurtymyzdy el qorǵaýǵa uiystyrdy. Orynbordaǵy birinshi qazaq quryltaiynda Alash partiiasy quryldy. Ekinshi quryltaida Alash avtonomiiasy jariialandy.
Egemendik kezeńinde Dúniejúzi qazaqtarynyń alǵashqy quryltaiy ótkizildi. Bul jiynda syrttaǵy qandastarymyz Atamekenge shaqyryldy. Uly kósh Táýelsiz Qazaqstanǵa bet aldy» - dedi Memleket basshysy.
Prezidenttiń aitýynsha, qazaq quryltailarynyń bári el damýyna zor ózgeris ákelgen.
«Keńesshil el kemdik kórmeidi» degen naqyl sóz sodan qalsa kerek. Biz babalar jolyn ustanyp, Quryltai shaqyrý dástúrin jańǵyrttyq. Eldigimizdi nyǵaityp, birligimizdi bekemdeiik dep, búgin bas qosyp otyrmyz. Ulttyq quryltaidyń birinshi otyrysyn Ulytaýda ótkizýge uiǵarym jasaldy. Ulyq ulystyń bastaýynda turǵan Joshy han kesenesiniń irgesine aq shatyr ornattyq. Munyń zor simvoldyq máni bar. Eldiń birligi, ulttyń tutastyǵy degenimiz – osy.
Men quryltaiǵa keler aldynda tutas eldiń atynan uly Joshy hannyń rýhyna quran baǵyshtap, qurban shaldym. Jańa Qazaqstandy qurý jolyndaǵy tarihi qadamnyń kieli jerden bastalýy – jaqsy yrym. Bárimiz babalardyń arýaǵy qoldap, isimiz ońynan bolsyn dep tileimiz» - dedi Qasym-Jomart Toqaev jiyn barysynda.
Aita keteiik, Prezident janynan qurylǵan Ulttyq quryltaidyń alǵashqy otyrysy araǵa shirek ǵasyr salyp oblys mártebesin qaita alǵan Ulytaý óńirinde ótip jatyr.
