Eldegi tártipsizdikter boiynsha 8354 ákimshilik is sotqa jetken. Bul týraly QR Bas prokýrorynyń aǵa kómekshisi Azamat Sarǵazin ortalyq kommýnikatsiialar qyzmetinde ótken brifingide málim etti, dep habarlaidy QazAqparat.
«Ákimshilik quqyq buzý faktilerine jeke toqtalyp óteiin. Sottar osy oqiǵalarǵa bailanysty barlyǵy 8354 ákimshilik isti qarady. Sottar men prokýrorlar jeńildetetin mán-jai men kináli adamdardyń ókingenin eskerip otyr. 3337 quqyqbuzýshyǵa qamaqqa alý nemese aiyppul túrinde jaza qoldanylmai, eskertý ǵana jasaldy. 1653 is boiynsha sot aiyppul saldy. Osy sátte 1002 adam qamaqta», - dedi ol.
Aitýynsha, qamaqtaǵy adamdardyń ákimshilik jazasyn jeńildetý maqsatynda prokýrorlar apelliatsiialyq sotqa 1758 ótinish hat engizgen.
«Qazirgi tańda prokýrorlardyń ótinish hattary boiynsha 676 adam qamaqtan bosatyldy. 344 adamnyń aiyppuly eskertýge aýystyryldy. Prokýrorlardyń jazany jeńildetýge jáne aiyppuldy eskertýge aýystyrýǵa baǵyttalǵan 738 ótinish-haty qaralyp jatyr. Budan bólek, taǵy 358 ákimshilik is materialdary sotqa jiberilmei toqtatyldy», - dedi Bas prokýrordyń aǵa kómekshisi.
