Qyzylorda oblysynyń prokýrorlary ata-analarmen birge oqýshylardyń "VKontakte" áleýmettik jelisindegi akkaýnttaryn óshirgizdi, dep xabarlaidy QazAqparat.
"Sońǵy kezderi áleýmettik jeliler men WhatsApp mobildik qosymshasynda jastar arasynda sýitsidti nasihattaityn «Kók kit», «Meni 4:20-da oiat», «Kitter teńizi» ataýly paraqshalardan saq bolýǵa shaqyratyn aqparattar keńinen taralýda. Qyzylorda oblystyq prokýratýrasy jastardyń qaýipsizdigin qamtamasyz etý jumystary, atalǵan aqparattyń jeli qoldanýshylar arasynda keńinen taralýyna deiin qolǵa alynǵan. Atap aitqanda, oblystaǵy 26 mekteptiń 106 oqýshysy «VKontakte» áleýmettik jelisiniń sýitsidti nasihattaityn paraqshalaryna tirkelý derekteri 2016 jyly anyqtalǵan bolatyn. Shuǵyl sharalar qoldanylyp, ata-analardyń qatysýymen barlyq oqýshylardyń akkaýnttary óshirildi. Árbir oqýshyǵa jasalǵan jeke jospar boiynsha psihodiagnostikalyq jumystar uiymdastyryldy", - delingen Qyzylorda oblystyq prokýratýrasynyń baspasóz xabarlamasynda.
Mektep psihologtary oqýshylardyń ata-analarymen tyǵyz bailanys ornatyp, balalarǵa birlesken baqylaý júrgizýde. Qazirgi tańda, oqýshylardyń psihikalyq kóńil-kúileri qalypty jaǵdaida, belgili bolǵandai balalardy bul áreketke jai ǵana oiynǵa degen qyzyǵýshylyq itermelegen.
Jyl basynan mundai paraqshalarǵa Qyzylorda jastarynyń tirkelý faktileri anyqtalǵan joq, kámeletke tolmaǵandar arasynda birde-bir sýitsid faktisi tirkelmegen.
Oblystyq prokýratýranyń bastamasy boiynsha ýákiletti organmen sýitsidti nasihattaityn 30 internet-paraqshalar buǵattalǵan. Degenmen, qaskúnemder úshin ataýyn ózgertip sol mazmundaǵy basqa paraqsha ashý qiyn emes.
Sondyqtan, sabaq ýaqytynda da, úide de balanyń kóńil kúiine, júris-turysyna nazar aýdaryp, internetke baqylaýsyz kirýine jol bermeý usynylady.
