Foto: Almaty.tv
Astanada Perizat Qairatqa qatysty ótip jatqan sot protsesinde prokýrorlar ony 10 jylǵa bas bostandyǵynan aiyrýdy surady. Sot otyrysynda jabyq tergeý kezinde alynǵan aiǵaqtardyń bir bóligi alǵash ret jariialandy, dep habarlaidy Ult.kz.
Prokýror Arman Qazeken Taiaý Shyǵystaǵy zardap shekkenderge qatysty epizodtyń mán-jaiyn ashyp, Perizat Qairattyń óz kinásin moiyndamaǵanyn atap ótti. Aiyptalýshy sotta Palestinaǵa aqshany qolma-qol aparǵanyn, sebebi bank arqyly aýdarý áskeri janjalǵa qarjylai qoldaý retinde baǵalanýy múmkin ekenin aitty.
— Bul saparlardyń maqsaty shyn máninde ózgeshe bolǵan. Tergeý derekterine súiensek, ol Birikken Arab Ámirlikterinde qymbat saýdamen de ainalysqan, — dedi prokýror Qazeken.
Sondai-aq, Perizat Qairattyń anasy Alashbaeva 559 million teńgeni «Palestina halqyna gýmanitarlyq kómek» degen jeleýmen aldyn ala sóz bailasý arqyly iemdenip, qarajatty gúl dúkenin satyp alý arqyly zańdastyrǵany úshin aiyptalyp otyr.
Buǵan deiin prokýror Madina Orazalina mundai alaiaqtyq áreketterge memlekettiń endi jol bermeitinin, al bul is qoǵam úshin sabaq bolýy tiis ekenin málimdegen bolatyn.
Qazirgi ýaqytta is boiynsha pikirtalastar jalǵasyp jatyr.
