Fotokollaj: Azattyq Rýhy
Prokýror biznesmen, eks-prezidenttiń burynǵy qudasy Qairat Boranbaevty 8 jylǵa bas bostandyǵynan aiyryp, múlkin tárkileýdi surady, dep habarlaidy QazAqparat.
Búgin elordanyń Saryarqa aýdandyq №2 sotynda Qairat Boranbaevqa qatysty qylmystyq isti qaraý jalǵasty.
«Qairat Boranbaevty Qylmystyq kodekstiń 28-babynyń 5-bóligine (qylmys jasaýǵa járdemdesý), atalǵan baptyń 2-tarmaǵynyń 189-bóliginiń 4-bóligine (jymqyrý nemese bógdeniń múlkin asa iri mólsherde urlaý), sonymen qatar 218-baptyń 3-bóligine sáikes qylmystyq jolmen iri kólemde aqsha jáne múlik ielengeni úshin kináli dep tanýdy suraimyn. Oǵan QR Qylmystyq kodekstiń 28-baby, 5-baby jáne 4-baptyń 189-bóligi boiynsha jaza taǵaiyndalsyn. Iaǵni ómir boiy memlekettik qyzmet, Qarjy naryǵy men qarjy uiymdaryn retteý men baqylaý jáne qadaǵalaý jónindegi ýákiletti organda, memlekettik uiymdar men kvazimemlekettik sektor sýbektilerinde laýazymdardy atqarý quqyǵynan aiyra otyryp, 8 jyl bas bostandyǵynan aiyrý jáne 218-baby 3-bóligi boiynsha múlikterin tárkileý suralady», - dedi memlekettik aiyptaýshy Aijan Aimaǵanova sotta.
Sondai-aq, ol Qairat Boranbaevqa jazasyn ortasha qaýipsizdik qylmystyq-atqarý júiesi mekemesinde óteý rejimin taǵaiyndaýdy surady.
«Q. Boranbaevqa qatysty qamaýda ustaý túrindegi bultartpaý sharasy burynǵydai qaldyrylsyn. Boranbaevty qamaýda ustaý ýaqyty 15 naýryzdan bastap úkim zańdy kúshine engen kúnge deiin 1,5 kún bas bostandyǵynan aiyrý úshin 1 kún esebinen jaza merzimine esepteýdi suraimyn. Oǵan tiesili jyljymaityn múlikke jáne aqshalai qarajatqa salynǵan tyiym múlikti tárkileýge jáne oǵan qatysty basqa qylmystyq isti tergeýge bailanysty sol kúiinde qaldyrylsyn», - dedi prokýror.
Odan bólek, sotta Qylmystyq kodekstiń 49-babyna sáikes Q. Boranbaevqa (arnaýly, áskeri ataq-dárejeleri, sheni men diplomatiialyq dárejesinen, biliktiligi jáne memlekettik ataqtarynan aiyrý) berilgen memlekettik nagradalardy keri qaitarýda suraldy. Olardyń qatarynda «Qurmet», «Eren eńbegi úshin», «Parasat» jáne úshinshi dárejeli Barys ordeni bar.
Aita keteiik, Astanada Qairat Boranbaevqa qatysty sot otyrysy byltyr jeltoqsanda bastalǵan edi.
Qairat Boranbaev pen onyń biznes-seriktesi Roman Nahanov, sondai-aq Qazaq Gaz AQ basqarma basshysynyń burynǵy orynbasary Taiyr Januzaq suiytylǵan munai gazyn satyp alý kezinde 14,5 mlrd teńge jymqyrdy jáne qylmystyq jolmen alynǵan qarajatty zańdastyrdy degen kúdikke ilindi.
Aiyptaýshylardyń 38 milliard teńge aqshasy, 15 jyljymaityn múlki, úsh avtokóligi buǵattaldy.
Qarjylyq monitoring agenttigi de gaz eksporty kezindegi jymqyrý jáne qylmystyq jolmen tabylǵan múlikti zańdastyrý isteri aiasynda Boranbaev pen basqa tulǵalarǵa qatysty sotqa deiingi tergeýdi jalǵastyryp jatqanyn habarlaǵan bolatyn.
Eske salsaq, Qairat Boranbaev – qazaqstandyq kásipker, Nursultan Nazarbaevtyń burynǵy qudasy. Onyń qyzy Álima Dariǵa Nazarbaevanyń uly Aisultanǵa turmysqa shyqqan bolatyn. Aisultan 2020 jyly tamyz aiynda qaitys boldy.
