"Biýdjet qarjysyn jymqyrdy" dep aiyptalǵan burynǵy energetika vitse-ministri Anatolii Shkarýpaǵa memlekettik aiyptaýshy 10 jyl túrme jazasyn surady. Prokýror burynǵy sheneýnikke ómir baqi memlekettik qyzmetpen ainalysýyna tyiym salyp, qaýipsizdigi orta dárejedegi koloniiaǵa jiberýdi ótindi.
"Turǵyn úi-kommýnaldyq sharýashylyǵyn damytý qory" basqarmasynyń burynǵy tóraǵasy Qaisar Baidaly jáne ENERCO kompaniiasynyń direktory Erlan Nábievti prokýror 8 jylǵa bas bostandyǵynan aiyrýdy ótindi.
Tergeý organdarynyń málimetinshe, burynǵy vitse-ministr Shkarýpa Saran qalasynyń ákimi bolyp turǵan kezde (2014-2017jj.) ortalyq jylý jelisi men qazandyǵy joq qaladaǵy turǵyn úilerge "jylý eseptegish aspaptardy satyp alý jáne ornatý úshin" turǵyn úi-kommýnaldyq sharýashylyǵyn damytý qoryna biýdjetten bólingen aqsha qoldy bolǵan. Tergeýshiler atalǵan qor ENERCO kompaniiasyna 215 million teńgeden astam qarjyny zańsyz aýdarǵan dep sanaidy. Buǵan deiin aiyptalýshylar taǵylǵan aiypty moiyndamaǵan.
Jaryssóz kezinde memlekettik aiyptaýshy kópqabatty úilerge eseptegish quraldardyń qajet bolmaǵanyn atap ótti. Aiyptaý tarabynyń aitýynsha, jylý qazandyǵynyń salynbaityny 2015 jyly belgili bolǵan.
Prokýratýra jábirlenýshi retinde tanylǵan "Turǵyn úi-kommýnaldyq sharýashylyǵyn damytý qory" basqarmasynyń aiyptalýshylardan 380 million teńge óndirip alý týraly azamattyq shaǵymyn tolyq qanaǵattandyrýdy ótindi.
Buǵan deiin Shkarýpa sotqa deiingi tergeý amaldary kezinde azaptaýǵa ushyraǵanyn aitqan. Ol sonymen birge qylmystyq is pen saraptama kezindegi zańsyzdyqtardy alǵa tartyp, is materialdarynyń "burmalanǵanyn" aitqan. Tergeý organdary muny teristegen.
Shkarýpa buǵan qosa, tergeý organdaryn – "Konstitýtsiiada kórsetilgen qorǵalý quqyǵyn buzdy", prokýratýrany "zańbuzýshylyq týraly shaǵymdarǵa qulaq aspady" dep aiyptaǵan.
Sot protsesi 2019 jyly jeltoqsan aiynda bastalǵan. Shkarýpa eki jyldan astam ýaqyt tergeýde bolǵan. 2018 jyly 16 qarashada qamaýǵa alynǵan, 2020 jyly mamyr aiynda úiqamaqqa jiberilgen.
