Almaty qalasy prokýrorynyń kómekshisi Álisher Myrzahanov qalada bes adamdy atyp óltirgen Igor Dýjnovtyń isi boiynsha protseske memlekettik aiyptaýshy retinde qatysyp, sottalýshyny bes adamdy aiaýsyz óltirgeni úshin kináli dep tanýdy jáne ony ómir boiyna bas bostandyǵynan aiyrýdy talap etti, dep habarlaidy Sputnik Qazaqstan.
Memlekettik aiyptaýshy jaryssózde ne aitty?
Memlekettik aiyptaýshy Álisher Myrzahanovtyń aitýynsha, sot otyrystary barysynda sottalýshy Igor Dýjnovtyń eki politsiia qyzmetkeri men jeke sot oryndaýshysyn, jalpy alǵanda bes adamdy óltirgeni tolyq dáleldengen.
"Dýjnov sot sheshiminiń oryndalýyna belsendi kedergi keltirdi, sodan keiin Ábenov, Súleev, Baiǵaziev, Turǵanov, Bektashoǵlyny qasaqana óltirdi, bul tek kýágerler men jábirlenýshilerdiń aiǵaǵymen ǵana emes, sondai-aq bolǵan oqiǵa túsirilgen videomen rastaldy. ( ... ) Dálel jiyntyǵy maǵan Dýjnovtyń kinási tolyǵymen dáleldengenin jáne onyń qylmystyq áreketterine tiisti quqyqtyq baǵa berilgenin aitýǵa múmkindik beredi. (...) Dýjnovtyń óz áreketine qatysty eshqandai ókinishi joq ekenin eskerip, sot aldynda ony eń uzaq merzimge bas bostandyǵynan aiyrý týraly ótinish jasaý qajet dep sanaimyn", - dedi ol jaryssózde.
Memlekettik aiyptaýshy Igor Dýjnovty Qazaqstannyń Qylmystyq kodeksiniń baptary boiynsha kináli dep tanýdy jáne jaza taǵaiyndaýdy talap etti:
- 172-bap – "sheteldik qarýly qaqtyǵystarǵa qatysý" – 7 jyl bas bostandyǵynan aiyrý;
- 430-bap 1-bóligi – "sot úkimin, sot sheshimin nemese ózge de sot aktisin ne atqarý qujatty oryndamaý" – 3 jyl bas bostandyǵynan aiyrý;
- 24-bap 3-bóligi ("qylmysqa daiyndalý jáne qylmysqa oqtalý) jáne 99-bólim 2-bóligi 1 jáne 6 tarmaqtar ("basqa adamdardyń ómiri úshin qaýipti tásilmen jasalǵan eki jáne odan da kóp adamdy óltirý") – 15 jyl bas bostandyǵynan aiyrý;
- 408-bap – "Sot tóreligin nemese sotqa deiingi tergep-tekserýdi júzege asyratyn adamnyń ómirine qol suǵý" – ómir boiy bas bostandyǵynan aiyrý;
- 99-bap 2-bóligi 1 jáne 6-tarmaqtar – "basqa adamdardyń ómirine qaýipti tásilmen jasalǵan eki jáne odan da kóp adamdy óltirý" – ómir boiy bas bostandyǵynan aiyrý;
- 380-bap – "Bilik ókiline qatysty kúsh qoldaný" – ómir boiy bas bostandyǵynan aiyrý.
Prokýror Dýjnovqa múlkin tárkilemei, ómir boiynsha bas bostandyǵyna aiyrý jazasyn berýdi surady. Onyń tótenshe qaýipti deńgeidegi Qylmystyq-atqarý júiesi mekemesinde jazasyn óteýin talap etti.
Igor Dýjnovtyń qolynan qaza tapqan sot oryndaýshysy, eki politsiia qyzmetkeri jáne eki azamattyń týystary memlekettik aiyptaýshynyń sottalýshyǵa ómir boiy bas bostandyǵynan aiyrý jazasyn taǵaiyndaý týraly talabyn qoldady.
Olar sondai-aq aiyptalýshyny qylmys jasaýǵa itermelegen adamdar retinde Dýjnovtyń áieli Anaid Demirchian men onyń qyzy Karine Dýjnovany jaýapqa tartý úshin birneshe ret sotqa júgindi.
Dýjnov pen onyń advokatynyń pozitsiiasy
Igor Dýjnovtyń 2021 jyldyń qyrkúieginde bes adamdy atyp óltirgenin ózin-ózi qorǵaý dep atady.
"Jábirlenýshiler, zańsyz meniń úiime kirgender meniń jaqyn adamdarymnyń quqyǵyn buzǵysy keldi. Olardy kóshege zańsyz shyǵarǵysy keldi. Sol kezde de, qazir de bul zulymdyqty toqtatýdyń basqa joly joq ekenin bilemin. Óz balalarymdy qorǵaýsyz qaldyra almadym. Menińshe, ákesiniń balasyn satyp ketýi – eń qorqynyshty qylmys", - dedi Igor Dýjnov jaryssóz barysynda.
Onyń bul oiyn qorǵaýshysy da qoldady. Ol bul qaiǵyly oqiǵaǵa bank qyzmetkerleri men olardyń sybailastarynyń zańsyz áreketi sebep bolǵanyn aitady.
"Bankter, olardyń qyzmetkerleri jáne seriktesteri elimizde qalaǵanyn jasai bastady. Halyq bankterdiń jáne olarǵa jaqyn sot oryndaýshylarynyń áreketterinen zardap shekti jáne sharshady. ( ... ) Qarjylyq oligarhiia men bankterdiń seriktesteri baiyp, eldiń qarapaiym halqynyń deńgeii tómendedi. Igor Dýjnovtyń belsendi qarsylyǵynan keiin ǵana memleket bank oligarhiiasynyń áreketi nátijesinde paida bolǵan qatygez, adamgershilikke jatpaityn tájiribeni joia bastady", - dedi sottalýshynyń advokaty Nikolai Harchenko.
Igor Dýjnovtyń taǵy bir advokaty – Ekaterina Bezlatneva jaryssóz barysynda tergeý-jedel tobynyń qyzmetkerleri qylmys bolǵan jerde, sondai-aq is boiynsha odan ári tergeý barysynda jasaǵan birqatar buzýshylyqty atady.
Sottyń kezekti otyrysy 21 sáýirde ótedi. Sottalýshy Igor Dýjnov sottaǵy sońǵy sózin aitady.
Almatydaǵy atys
2021 jyldyń 20 qyrkúiegi keshke Almaty turǵyny Igor Dýjnov otbasyn úiden shyǵarýǵa kelgen adamdarǵa oq atty. Bes adam qaitys boldy: eki politsei, bir sot oryndaýshysy, úidiń jańa iesi men onyń ókili.
Kúdiktiniń otbasyna tiesili turǵyn úi onyń aldynda bankke qaryz boiynsha úshinshi tarapqa satylǵan. Úidiń burynǵy iesi sot sheshimimen kelispei, úidi bosatqysy kelmegen.
Sotta Dýjnov adamdardyń ólimine bailanysty ókinetinin aitty. Ol mundai jaǵdaiǵa "zańsyzdyq pen sot ozbyrlyǵy, sot oryndaýshysynyń zańsyz áreketteri" sebep bolǵanyn aitty.
Buǵan deiin aldyn ala sot otyrysynda bas prokýratýra Dýjnov qylmysty josparlaǵan, ol karabindi oqtap, garajǵa jasyrǵan dep málimdedi.
Bas prokýratýranyń qylmystyq qýdalaý qyzmetiniń aǵa prokýrory Shyńǵyshan Pusyrmanovtyń aitýynsha, sot oryndaýshysy, úidiń jańa iesi, advokattyń kómekshisi aýlaǵa kirge kezde Dýjnov qarýyn alýǵa barǵan.
Tergeý Dýjnovtyń aýlasyna kirgen adamdardy qabyrǵaǵa qaz-qatar turǵyzyp, birinen soń birin atqanyn anyqtady. Sodan keiin ol kóshege shyǵyp, sol jerde turǵan politsiia qyzmetkerlerine oq jaýdyrǵan. Biraq olar kóliktiń artyna jasyrynyp úlgergen, olardyń biri oq jaýdyrǵan adamnyń qarýyn tartyp aldy.
Jalpy alǵanda Dýjnov karabinnen 10 ret oq atqan, onyń ishinde toǵyzyn segiz sekýndta atty.
