Qazaqstan Bas prokýratýrasy "BankTuranÁlem" AQ-nyń burynǵy basqarma tóraǵasy Erjan Tátishevtiń ólimi boiynsha oppozitsiialyq saiasatker Muhtar Ábliazovtiń ústinen sotqa deiingi tergeý aiaqtalǵanyn habarlady.
Prokýratýra málimetinshe, Ábliazovtiń isi Qylmystyq kodekstiń 1997 jylǵy redaktsiiasynyń 28-baby 3-tarmaǵy (qylmys jasaýdy uiymdastyrǵan nemese onyń oryndalýyna basshylyq jasaǵan adam) jáne 96-baby 3-tarmaǵynyń "j" jáne "z" bólimderi (top bolyp, aldyn ala sóz bailasý arqyly, paida tabý maqsatymen, sol siiaqty jaldanyp ne qaraqshylyqpen, qorqytyp alýshylyqpen, ia banditizmmen ushtasqan jeke adamǵa qarsy qylmys) boiynsha dárejelengen.
Vedomstvo habarlamasynda kúdikti Ábliazov pen onyń qorǵaýshysyna tergeý sharalarynyń aiaqtalyp, is materialdarymen tanysý bastalǵanyn eskertedi.
"Qylmystyq-protsessýaldyq kodekstiń 296-babyna sai, kúdikti men onyń qorǵaýshysy qylmystyq is materialymen birge jáne jekelei tanysýǵa, memlekettik nemese zańmen qorǵalatyn basqa da qupiialardan ózge kez-kelgen málimetti shyǵaryp alýǵa haqyly" delingen prokýratýra habarlamasynda.
Resmi málimet boiynsha, Ábliazov budan ózge qosymsha tergeý amaldaryn júrgizý, ia bolmasa basqa da protsessýaldyq sheshimder qabyldaý jáne sotty alqa sotynyń qaraýy týraly ótinish bere alady.
Qylmystyq is materialymen tanysý 2018 jyly 5 qyrkúiekte bas prokýratýranyń Almatydaǵy ókildiginde bolady.
Erjan Tátishev 2004 jyly ańshylyqta júrgende oq tiip ólgen. Sol kezde buny sot "jazataiym oqiǵa" dep tanyp, bankirdiń janynda birge bolǵan kásipker Murathan Toqmádidi bir jylǵa sottaǵan. Biraq 2017 jyly is qaita qaralyp, Murathan Toqmádi Tátishevti "Turan Álem" bankin ielenýdi kózdegen "Muhtar Ábliazovtiń tapsyrysymen óltirdim" degen. Sot ony 2018 jyly on jarym jylǵa sottady.
Qazaqstan bas prokýratýrasy 4 sáýirde Muhtar Ábliazovtiń ústinen "bankir Erjan Tátishevti óltirýdi uiymdastyrdy" degen aiyppen qylmystyq is qozǵaǵan.
Osydan keiin Muhtar Ábliazov Azattyqqa Erjan Tátishev ólimine qatysty tergeýge jáne sotqa qatysýǵa daiyn ekenin málimdegen. Ol sotqa Tátishev ólimine qatysy bar dep sottalǵan Murathan Toqmadi kelse ǵana otyrystarǵa video arqyly tikelei qosylatynyn aitqan.
Muhtar Ábliazov 2009 jyldan beri shetelde turady, ózine qatysty barlyq aiyptaýlardyń saiasi sebebi bar dep sanaidy. Qazaqstan soty Ábliazovti "qylmystyq top qurdy" jáne "aqsha jymqyrdy" dep, 2017 jyly syrttai 20 jylǵa sottaǵan.
