Almaty oblysy Qarasai aýdandyq prokýratýrasynyń qyzmetkeri Qyrǵyzstan azamaty Vikram Rýzahýnovtyń ustalýyna qatysty pikir bildirdi, - dep habarlaidy Tengrinews.kz tilshisi.
Prokýratýra ókili 7 qańtarda Almaty oblysy Jambyl aýdany aýmaǵynda Almaty-Bishkek tasjolynda jedel-izdestirý is-sharalaryn júrgizý kezinde Tarǵap kenti mańynda, UQK Shekara qyzmetiniń arnaiy kúshteriniń statsionarlyq beketinde kólikter tekserilgenin aitty. Osy jumys barysynda "tekserýdi qajet etken birqatar adam, onyń ishinde Qyrǵyz Respýblikasynyń azamaty Rýzahýnov Vikram bolǵan".
"Ol dene jaraqatyna bailanysty Qarasai aýdanynyń arnaiy qabyldaý bólimine jetkizildi. Dene jaraqattarynyń sebebin anyqtaý múmkin bolmaǵan. Rýzahýnovty ustaǵan kezde kólikte qarý tabylmaǵanyn aita ketken jón", - dep túsindirdi prokýratýra qyzmetkeri.
Prokýratýra málimetinshe, Almaty politsiia departamenti qyzmetkerleri Rýzahýnovty birinshi bolyp tergegen.
"Rýzahýnovty tergeý barysynda Almaty aýmaǵyndaǵy tártipsizdikterge qatyspaǵany anyqtaldy. Sondyqtan ol bosatyldy", - dedi vedomstvo ókili.
Prokýratýra ókili jedel-izdestirý is-sharalaryn júrgizý kezeńinde UQK Shekara qyzmetiniń arnaiy kúshteri Qyrǵyzstannyń bes azamatyn ustaǵanyn, aiǵaqtar tekserilgennen keiin barlyǵy bosatylǵanyn túsindirdi.
"Deportatsiialanǵandar bolǵan joq. Aitylǵan azamattar kóshi-qon zańnamasyn buzbaǵan", - dep tolyqtyrdy prokýratýra ókili.
Memlekettik telearna efirinde 9 qańtarda video kórsetilgen edi. Onda er adam Qyrǵyzstan azamaty ekenin jáne oǵan Almatydaǵy mitingke qatysqany úshin 90 myń teńge usynylǵanyn aitty.
Keiin ustalǵan adam belgili qyrǵyz mýzykanty Vikram Rýzahýnov ekeni belgili boldy. Ol bul áreketke bostandyqqa shyqqysy kelgendikten keliskenin málimdedi. Rýzahýnov BAQ-ta jariialaǵan aqparattardan keiin bosatylyp, Qyrǵyzstanǵa jetkizildi.
