Qazaqstan kásipkerleriniń quqyqtaryn qorǵaý jónindegi ýákil Rústem Júrsinov áleýmettik jelide prokýratýranyń kásipkerlerdiń quqyǵyn qalai qorǵaitynyn jazdy, dep habarlaidy "Ult aqparat".
«Bas prokýratýradaǵy selektorlyq keńestiń jumysyna qatysyp, jer qatynastary men sáýlet salasyndaǵy kóptegen júielik problemalar, salyq organdarynyń mámilelerdi jaramsyz dep tanýy týraly sottarǵa talap aryz berýine qatysty týyndaityn kásipkerlerdiń shaǵymdary týraly aittym. Mundai shaǵymdardyń sany jyldan jylǵa artyp keledi. Keiingi jyldary biz qylmystyq jáne ákimshilik ister boiynsha kásipkerlik qyzmetke kedergi keltirýge qatysty nóldik statistikany kórip otyrmyz. QK-niń 365 jáne ÁQBtK-niń 173-baptary jumys istemeidi», - dep jazady Rústem Júrsinov facebook paraqshasynda.
Onyń habarlaýynsha biznestiń jer resýrstaryna qol jetkize almai otyr. Óitkeni egjei-tegjeili josparlaý jobalarynyń bolmaýyna jáne eldi mekenderdiń bas josparlarynyń eskirgeninine bailanysty kásipkerler jer ýchaskelerin alýdan shektelgen.
«Sondai-aq, prokýratýra organdaryna óńirlik kásipkerler palatalarymen neǵurlym problemalyq baǵyttar boiynsha atqarylýy tiis jumystardy úilestirý úshin birlesken is-sharalar josparyn jasaýdy usyndym - bul biznestiń barynsha qorǵalýyn qamtamasyz etedi. QR Bas prokýrorynyń orynbasary Bolat Dembaev oblys prokýrorlaryna jáne olarǵa teńestirilgen prokýrorlarǵa Bas prokýrordyń qadaǵalaýdy kúsheitý jónindegi nusqaýy túskenge deiin tapsyrma berdi. Atap aitqanda prokýratýra organdarynda kásipkerlerdiń ótinishterin qaraýdy jeke baqylaýǵa alýdy, prokýratýranyń aralasýyn talap etetin júieli máselelerdi anyqtaý úshin biznes ókilderinen túsetin ótinishterge sapaly taldaý jáne tekserý júrgizýdi, ótinishterdi qaraý jáne tekserý nátijeleri boiynsha prokýrorlyq qadaǵalaý nemese kináli laýazymdy tulǵalardyń jaýapkershiligi týraly (qylmystyq jaýapkershilikke deiin) máseleni qoia otyryp, den qoiý sharalaryn qabyldaýdy mindetine aldy», - deidi ol.
Osylaisha, Rústem Júrsinov biznes ekonomikalyq ainalymda qalýǵa, ekonomikanyń damýyna odan ári úles qosýǵa múmkindik alatynyna, máselelerdi sheshýge baǵyttalǵan birlesken jumys óz jemisin beretinine senim bildirdi.
«Bas prokýratýra Memleket basshysynyń 1 qyrkúiektegi Qazaqstan halqyna Joldaýynda bergen tapsyrmasy aiasynda bizneske qysymdy azaitý boiynsha júieli jáne tiimdi jumys júrgizip jatqany qýantady», - dep túidi ol.
