Meditsina ǵylymdarynyń doktory, professor Erbolat Dálenov koronavirýstan emdelgisi keletin adam eń aldymen úrei men depressiiaǵa berilmeýi kerektigin eskertedi. Onyń aitýynsha, tiisti em-dommen qatar adam kóńil-kúiin túsirmese, aýrýdy eńserý múmkindigi arta túsedi, dep habarlaidy QazAqparat.
«2020 jyldyń qalai ótip bara jatqanyn kórip otyrsyz. Qanshama adam virýs juqtyryp, indetten qanshama adam kóz jumdy. Aýrýdyń azabynan áli birjolata qutylǵan joqpyz. Sol sebepti myna jailarǵa áli de basa nazar aýdarý kerek. Eń aldymen, koronavirýsty aǵzaǵa engizip, iaǵni juqtyryp alýdan saqtanǵan jón. Al eger koronavirýs juqtyryp alsańyz, onyń aýyr áserin boldyrmaý kerek. Eń mańyzdysy osy. Aq halatty abzal jandar burynnan eskertip keledi: epidemiologiialyq rejimdi qatań saqtaý kerek. Ekinshiden, koronavirýstyń adam aǵzasyna engennen keiin áser etý joldary bar. Kópshilik ony bile bermeidi. Soǵan bailanysty eshqandai asqyný bolmaý úshin aýrýdyń aldyn alý kerek. Úshinshiden, aýyrǵan adamdardy durystap saýyqtyrý kerek. Ol óte kúrdeli ári mazmundy jumys. Virýsty eńserý úshin eń birinshiden adamnyń kóńil-kúii kóterińki júrýi kerek, óitkeni depressiia men úrei onsyz da aýyryp turǵan adamnyń eńsesin tipti túsirip, aǵzasyn álsiretip jiberedi», - deidi Erbolat Dálenov QazAqparat tilshisine.
Professor elimizde koronavirýs juqtyrǵandardyń besten tórt bóligi aýrýdy jeńil kótergenin aitady. Qalǵany orta jáne aýyr dárejede ótkerip jatyr.
«Koronavirýsty juqtyryp, aýyryp, emdelgender arqany keńge salmaýy kerek. «Immýnitet paida boldy, qoryqpaimyz» dep otyra bergen jón emes. Eń aldymen durys tamaqtaný kerek. Qazir koronavirýstyń eń bir áseri – adam aǵzasyna engen soń qyltamyrlardyń ishki qabatyna kirip, sol jerde qabyný protsesiniń órshýinde. Qyltamyrlardyń kóbi ókpede. Ókpe qabynsa koronavirýs infektsiiasy sýrfaktant qatparyn qurtady. Ol maily qatpar. Ókpege mai kerek. Erte kezde bizdiń halyq týberkýlez nemese tumaý kezinde qoidyń quiryǵyn shyjǵyryp bergen, qymyz ishkizip, borsyqtyń maiyn ishkizgen. Ókpe – kóptegen garmonnyń deposy. Sondyqtan ókpe durys jumys isteýi úshin mai kerek», - deidi Erbolat Dálenov.
