Biz óz isimizde eń aldymen memleket múddesin basshylyqqa alýymyz kerek. Satbayev University Basqarma tóraǵasy – rektor Meiram Begentaev osyndai pikir bildirdi, dep habarlaidy QazAqparat.
«Memleket basshysynyń suhbatynan («Habar» telearnasyna bergen ekskliýzivti suhbaty) túigen negizgi oiym – biz óz isimizde eń aldymen memleket múddesin basshylyqqa alýymyz kerek. Biz árqaisymyz óz ornymyzda óz mindetterimizdi atqara otyryp, eń basty maqsatymyzǵa – oiǵa alǵan isimiz elge, barsha qazaqstandyqtardyń igiligine qanshalyqty paidaly bolatynyna súienip, isimizdi sol mindetpen salystyrýymyz kerek. Qańtar oqiǵasy kezinde onyń birqatar sheshimderin Batys elderiniń saiasatkerleri qoldamaitynyn Memleket basshysy, árine, bildi. Alaida lańkesterge toitarys berip, ulttyq múddelerdi qorǵaý qajet bolǵan jaǵdaida ol barlyq jaýapkershilikti óz moinyna aldy – bul halyqtyń qaýipsizdigin, beibit turǵyndardyń tynyshtyǵyn qamtamasyz etti», - dedi Meiram Begentaev.
Sonymen qatar ýniversitet rektory Prezident elimizge saiasi reformalar qajettigin málimdegenin eske saldy.
«Eldegi ártúrli saiasi kúshterdiń erkin básekelestigine qolaily jaǵdai jasalǵanda ǵana ekonomika jańasha damyp, jańa jaǵdailarǵa beiimdeledi degenge kelisemin. Saiasi básekelestik ekonomikanyń barlyq qazaqstandyqtardyń igiligi úshin tiimdirek jumys isteýin qamtamasyz etedi. Degenmen eldiń bolashaq damýy týraly ótkir qarama-qaishy pikirlerdiń qoǵamda ústemdik qurýynan aýlaq bolýymyz kerek», - dedi M. Begentaev.
Onyń paiymynsha, eń bastysy, Memleket basshysy men onyń ákimshiligi qastandyq jasaýshylardyń bastamasyna az ǵana ýaqyt ishinde tosqaýyl qoiyp, jaǵdaidy óz baqylaýyna ala bildi.
«Meniń oiymsha, eger de sál ǵana keshikkende, búkil elimiz budan da úlken shyǵyndar men kútpegen jaǵdailarǵa tap bolar edi», - dedi Satbayev University Basqarma tóraǵasy.
