Qazaqstan Prezidenti Qasym-Jomart Toqaevtyń tóraǵalyǵymen Nur-Sultan, Almaty, Shymkent qalalarynyń jáne oblystardyń ákimderi qatysqan keńes ótti, dep habarlaidy Aqordanyń baspasóz qyzmeti.
Jiyn barysynda Premer-Ministrdiń birinshi orynbasary - Qarjy ministri Á.Smaiylovtyń, Premer-Ministrdiń orynbasarlary J.Qasymbek pen G.Ábdiqalyqovanyń, Almaty qalasynyń ákimi B.Baibektiń jáne Pavlodar oblysynyń ákimi B.Baqaýovtyń esepteri tyńdaldy.
Qasym-Jomart Toqaev elimizdegi áleýmettik-ekonomikalyq jaǵdaidyń turaqty ekenin jáne memlekettik baǵdarlamalardyń dáiekti túrde júzege asyrylyp jatqanyn atap ótip, keibir baǵyttar boiynsha jumystardy jandandyrý qajettigin aitty.
- Tuńǵysh Prezidentimiz - Elbasynyń dana saiasatynyń arqasynda eń qiyn kezeńderge tabysty tótep berip, ekonomikanyń ósý qarqynyn qamtamasyz ettik jáne halyqtyń ál-aýqatyn arttyrdyq. Qazirgi tańda osy qarqyndy saqtaýdy, jumys tásilderin jetildirýdi jáne júktelgen mindetterdi sapaly oryndaýdy qamtamasyz etý qajet. Basty maqsat - azamattarymyzdyń ál-aýqatyn jáne bolashaqqa degen senimin arttyrý, - dedi Qazaqstan Prezidenti.
Basqosý sońynda Memleket basshysy ekonomikanyń ósimin, investitsiia tartý isin qamtamasyz etýge, áleýmettik turaqtylyqty nyǵaitýǵa, óńirlerdegi infraqurylymdyq jáne ekologiialyq ótkir problemalardy sheshýge, sý tasqynynyń aldyn alýǵa, turǵyn úi-kommýnaldyq sharýashylyǵyn jáne áleýmettik salany qamtamasyz etýge, sondai-aq kóktemgi egis jumystaryna daiyndyq jáne ony júrgizý jumystaryn uiymdastyrýǵa baǵyttalǵan birqatar tapsyrma berdi.
Berilgen tapsyrmalardyń bárin qatań baqylaýda ustaý Prezident Ákimshiligine tapsyryldy.
