Memleket basshysynyń Abai týraly maqalasy búgingi qazaq eliniń damýyna qan júgirter oi iirimderimen ózekti, Abai sóziniń ómirsheńdigimen qudyretti. Bul týraly filologiia ǵylymdarynyń doktory, professor Baýyrjan Erdembekov aitty, dep habarlaidy QazAqparat.
Q.Jubanov atyndaǵy Aqtóbe óńirlik memlekettik ýniversitetiniń rektory, filologiia ǵylymdarynyń doktory, professor Baýyrjan Erdembekov «Abai jáne HHI ǵasyrdaǵy Qazaqstan» maqalasyna orai óz oi-pikirin bildirdi.
«Memleket basshysynyń Abai týraly maqalasy búgingi qazaq eliniń damýyna qan júgirter oi iirimderimen ózekti, Abai sóziniń ómirsheńdigimen qudyretti. Abai óz zamanynda qazaqty el qylýdyń qarmana qamyn jasasa, onyń árbir sózi tasqa qashalǵandai bolashaqtyń aldynan kún ótken saiyn árlenip shyǵa beretinine kári ýaqyt kýá. Maqaladaǵy taqyrypshylar: «Ulttyq bolmystyń úlgisi», «Memleket isiniń múddelesi», «Jańa qoǵamnyń janashyry», «Álemdik mádeniettiń tulǵasy». Bul taqyrypshalardaǵy órilgen oilar almaǵaiyp zamanda rýhani jańǵyrýlar men ulttyq sananyń sony bir serpilisin qajetsingen osynaý bir qazaq qoǵamyna aqyn sózin jetkizýdi maqsat etken dep oilaimyz. Abai zamanynyń qazaǵy búgin qandai? Ózgerdi me? Abai synaǵan qazaq ózgerdi me? Sol qara sózdiń paiǵambary aitqan synnan nátije shyǵara aldy ma álde qalyń eli qazaǵy qairan jurtynyń bolashaǵy buldyr tartyp bara ma? Mine, osy máseleler maqalada qylań beredi. Abaidy taný – adamnyń ózin-ózi tanýy. Biz eldi, ultty Abaisha súiýdi úirenýimiz kerek nemese áleýmettik jaýapkershilikti Abaidyń «tolyq adam» formýlasynan izdegen jón. «Nege qazaqtyń bitim-bolmysyn, mádenietin Abai arqyly tanytpaimyz? Abaidy ultymyzdyń mádeni kapitaly retinde nasihattaýymyz kerek», deidi maqaladaǵy soqtaly oilar. Mine, soqtaly oilarǵa asa mán berip, ár qazaqtyń boiyna Abaidyń sózin uialata alsaq, qazaqtyń ushpaqqa shyǵarý haq», - dedi Baýyrjan Erdembekov.
