Memlekettik qyzmet isteri agenttiginiń tóraǵasy Anar Jaiylǵanova Prezidenttik kadrlyq rezervin jasaqtaý jumystary jóninde aityp berdi, dep habarlaidy QazAqparat.
«Ázirge kadrlyq rezevtiń kriteriilerin ázirlep jatyrmyz. Eń aldymen úmitkerdiń jasy mańyzdy. Jastar saiasaty zańyna sáikes, elimizde 29 jasqa deiingi adamdardy jastar sanatyna qosamyz. Biraq, BUU jastar men zeinetkerler jasyn taǵy kótergisi keledi. Máselen, Ispaniiada jastar jasy 33-ke deiin, ózge elderde - 35 jasqa deiin, Japoniia odan da kóp. Osyndai álemdik úrdisterdi qarap, naqty rezervke qabyldaýdyń naqty tártibin jariialaimyz», - dedi agenttik basshysy tilshilerge bergen suhbatynda.
Onyń aitýynsha, rezervke tehnikalyq mamandyq ieleri kóbirek qabyldanýy múmkin.
«Irikteý memlekettik qyzmetshilerden ǵana emes, ekonomikanyń barlyq sektorlarynyń ókilderi arasynda júrgiziledi. Bizge qazir ekonomister men IT-mamandar óte qajet. Ásirese, bilikti IT-mamandar barlyq salaǵa qajet. Tipti sot júiesinde kiberqylmysty ashatyn mamandar kerek. Sondyqtan, jańa tehnologiialarǵa bailanysty ekonomika sektorlarynan mamandar kóbirek irikteledi», - dedi A. Jaiylǵanova.
Sonymen birge, agenttik basshysy kadrlyq rezerv qurý boiynsha barlyq usynystardyń qabyldanatynyn jetkizdi.
«Birinshiden, jas menedjerlerdiń áleýetin paidalanyp, memlekettik apparat jumysyn sapaly túrde jańa deńgeige kótere alamyz. Ekinshiden, bul rezerv jastar úshin áleýmettik lift. Rezerv quramyn irikteý tártibin qarap jatyrmyz, túrli nusqalar nazarǵa alynýda. Sondai-aq, biz usynystarǵa ashyqpyz jáne rezervti qalyptastyrý jáne onyń áleýetin paidalaný týraly tyń oilardy qarastyrýǵa daiynbyz», - dedi Anar Jaiylǵanova.
Aita keteiik, Prezidenttik kadrlyq rezerv qurý bastamasy Memleket basshysy Qasym-Jomart Toqaevtyń sailaýaldy baǵdarlamasynda aityldy. Osy arqyly memleket jas ári daryndy jastarǵa qoldaý kórsetýdi kózdeidi.
300 adamnan turatyn alǵashqy kadrlyq rezervtiń tizimi jyl sońyna deiin daiyndalady.
.jpeg)