Prezidenttiń kadr rezervi jas býyn ókilderiniń jaýapty qyzmetke kelýi úshin jasalyp otyrǵan igi bastama. Bul týraly Aqordada Prezidenttik kadr rezervke kirgen jastarmen kezdesý barysynda Memleket basshysy Qasym-Jomart Toqaev aitty, dep habarlaidy "Ult aqparat".
«Búgingi kezdesýimizdiń mán-mańyzy erekshe. Qazaqta «Júzden júirik, myńnan tulpar» degen jaqsy sóz bar. Sizder Prezidenttik jastar kadr rezervine ótý úshin arnaiy báigede baq synap, alǵa shyqtyńyzdar. Bárińizdi shyn júrekten quttyqtaimyn! Ózderińizge belgili, kadrlyq rezerv jasaqtaý úshin aýqymdy jumys atqaryldy. Bul jobaǵa búkil elimiz boiynsha 13 myń adam qatysty. Sonyń ishinen 300 azamatty iriktep aldyq. Naýqanǵa qatysqan barlyq qyzmetkerge rizashylyǵymdy bildirip, olar nazarymyzda qalady dep aitqym keledi», - dedi kezdesýdi ashqan Memleket basshysy.
QR Prezidenti el basqarý isine aralasatyn tańdaýly jastardyń qataryna qosylý zor mártebe ekendigin basa aitty.
«Ózderińiz siiaqty ozyq oily, básekege qabiletti mamandar elimizge óte qajet. Jalpy, bul - jas býyn ókilderiniń jaýapty qyzmetke kelýi úshin jasalyp otyrǵan igi bastama. Osy rette ózderińiz siiaqty bilimdi ári talapty azamattarǵa úlken úmit artamyz. Sizder jańa Qazaqstannyń damýyna aianbai úles qosasyzdar dep senemin. Elimizdiń aldynda biik maqsattar tur. Eń aldymen memleketimizdi odan ary órkendetip, táýelsizdigimizdi nyǵaitýǵa tiispiz. Sondai-aq, azamattardyń ál-aýqatyn arttyryp, turmys sapasyn jaqsartýymyz kerek», - dedi Qasym-Jomart Toqaev.
Memleket basshysy bilik pen halyq arasyndaǵy ózara senimdi kúsheitý mańyzdy mindet ekendigin atap ótti.
«Osyǵan orai «Halyq únine qulaq asatyn memleket» tujyrymdamasy qolǵa alyndy. Memleketti basqarý júiesin jańǵyrtý maqsatymen aýqymdy reformalar júzege asyrylýda. Munyń bári jańa kezeńge qadam basqan Qazaqstannyń igiligi úshin jasalyp otyr», - dedi Prezident.
