Prezidenttik jastar kadr rezervine irikteý qatysýshylaryna jiti tekserý júrgiziledi, dep habarlaidy QazAqparat.
«Jarlyqqa sáikes, Kadrlyq rezerv úmitkerlerine tekserý júrgizemiz. Biz olardyń adaldyǵyn, qujattaryn jan-jaqty qaraimyz. Eger úmitker ózi týraly jalǵan aqparat berse, ony kez kelgen kezeńde irikteýden shyǵara alamyz. Eger úmitkerler týraly naqty málimetińiz bolsa, bizge jiberýge bolady. Biz máseleniń mán-jaiyn anyqtaimyz jáne qajet bolǵan jaǵdaida irikteýden shyǵaramyz. Biz ádildik pen ashyqtyqty qoldaimyz», - dedi QR Basqarý akademiiasynyń rektory, Prezidenttik kadr rezervine irikteý komissiiasynyń múshesi Erlan Ábil Úkimet úiindegi baspasóz máslihatynda.
Onyń aitýynsha, irikteýdiń kelesi kezeńine ótken qatysýshylardyń ortasha jasy - 30 jáne odan joǵary. Olardyń arasynda shet elderde, Qazaqstannyń úzdik JOO-larynda bilim alǵandar bar.
«Irikteýdiń kelesi kezeńine ótken 48 úmitker AQSh, Ulybritaniia, Qytai, Singapýr sekildi shet elderde bilim alǵan. Al 198 úmitker - Qazaqstanda da, shet elde de oqyǵan. Tek qana Qazaqstanda bilim alǵandar sany - 286, onyń 138-i elimizdiń úzdik JOO-laryn támamdaǵan. 19 úmitker Resei Federatsiiasynda bilim alǵan. Sondyqtan, olardy daiyndyqsyz boldy, kezdeisoq joǵary upai jinady dep aitýǵa bolmaidy», - dedi Erlan Ábil.
Aita keteiik, «Prezidenttiń Jastar kadr rezervine» irikteýdiń «Áleýetti baǵalaý» kezeńine 549 qatysýshy ótti. Bul kezeń esse jazý, jobany tanystyrý jáne quzyretti baǵalaý syndy 3 bólikten turady.
«Áleýetti baǵalaý» kezeńinen keiin sarapshylarmen suhbat ótedi. Oǵan aldyńǵy kezeńderde úzdik nátije kórsetken qatysýshylar jiberiledi. Odan keiin Prezident Ákimshiligi quratyn komissiia irikteýdiń aldyńǵy kezeńderinen tabysty ótken árbir úmitkermen jeke áńgimelesedi. Sonyń qorytyndysy boiynsha Ulttyq komissiia eń joǵary ball jinaǵan kandidattardy Prezidenttik jastar rezervine qabyldaý týraly sheshim qabyldaidy.
Irikteýdiń keiingi kezeńderine jiberiletin kandidattardyń shekti sany belgilengen. Atap aitqanda, testileý verifikatsiiasyna 1000 adam ǵana jiberiledi. Kelesi kezeń - áleýetti baǵalaýǵa - 600 adam, saraptamalyq komissiiada suhbattasýǵa - 400 adam, sońǵy Ulttyq komissiia otyrysynda - 330 adamnyń nátijesi qaralady.
